suhbattasqan: Nurgúl Abdýlla
kınotanýshy
Sharıpa Orazbaeva T.Júrgenov atyndaǵy Qazaq ulttyq óner akademııasynyń 2010 jylǵy túlegi jáne 2013 jyly tanymal rejısser ári senarıst Iraklı Kvırıkadzeniń sheberhanasynan magıstratýrany tamamdap, qazirgi tańda, doktorantýrada oqıdy. Maıra Fazyl 2005-2009 jyldar aralyǵynda óner akademııasyndaǵy dramatýrgııa mamandyǵy boıynsha Shahımarden Qusaıynovtyń sheberhanasynda bilim alǵan. Jas rejısser Sharıpa Uzarbaeva jáne senarıst Maıra Fazyl arasynda júrgizilgen suhbatty usynamyz.
HIII-shi «Eýrazııa» halyqaralyq kınofestıvali aıasynda uıymdastyrylǵan pıtchıngte sizdiń «Sileýsin» fılm-jobańyz basty júldege ıe boldy. Kóptegen sheteldik jáne otandyq prodıýsserlerdi qyzyqtyrǵany barshamyzǵa belgili. Endi dál osy jobany sizder «Berlınalede» kóptegen tanymal qoldaýshylardyń nazaryna usyndyńyzdar. Olar qalaı qabyldady eken?
Sharıpa: Úsh myń bir júz qatysýshylardyń arasynan bizdiń «Sileýsin» fılm-jobamyz úzdik ondyqtyń ishine kirdi. Bunyń ózi úlken kórsetkish dep oılaımyn. Biz qatysqan baǵdarlamada kóp degende 25 prodıýssermen kezdesýge múmkindik beriledi. Al, bizdiń jobamyzǵa qyzyǵýshylyq tanytqan prodıýsser sany otyzdan astam boldy. Ortalyq Azııadan óz jobasyn usynyp otyrǵan tek biz, Qazaqstan bolǵandyqtan, kórermen sany da aıtarlyqtaı kóp jınalǵany, árıne, biz úshin úlken qýanysh.
Maıra: Sheteldik áriptesterimiz de, prodıýsserler de qazaq halqynyń salt-dástúri men dúnıetanymyna asa qyzyǵýshylyq tanytady. Bir jaǵynan jobamyzdyń taqyryby áıel rejısserdiń kóz-qarasy arqyly áıel máselesin kóteretindikten, eýropalyqtarǵa tańdanys týdyrǵany jasyryn emes.
Sharıpa: Iá, árıne, qolǵa alyp otyrǵan jobamyzda áıel ómiri, ónyń ómirge degen súıispenshiligi jaıynda aıtylady. Áıel eń aldymen – ana! Ana men bala arasyndaǵy ózara baılanys jaıynda da sóz qozǵalmaq. Bundaǵy maqsatymyz – árbir keremet dúnıeniń anadan bastaý alatynyn kórsetkimiz keledi.
«Eýrazııa» jáne «Berlınale» festıvalderi aıasynda ótkizilgen baǵdarlama arqyly kórsetilgen bul jobaǵa naqty qoldaýshylar tabyldy ma?
Sharıpa: Árıne, eki jaqty baǵdarlama bizge kóp múmkindikter jasady. Prodıýsser Anna Kachko bizge qoldaý kórsetip otyr, sonymen qatar, franııalyq prodıýsserler de ózderiniń kómek qolyn sozýǵa daıyn ekenderin habarlady. Jáne de, elimizdiń «Sport jáne mádenıet» mınıstrligi de qyzyǵýshylyqtaryn jasyryp qalmady. Endigi kezekte, «Qazaqfılmnen» de ruqsat alyp qalýymyz múmkin. Tek jaqsylyqtarǵa úmittenemiz.
Sharıpa, sizdi rejısser retinde qandaı taqyryptar qyzyqtyrady?
Sharıpa: Meni kóbinese áleýmettik taqyryptar qyzyqtyrady. Ártúrli oqıǵany janama, astyrtyn kórsetkendi jón sanaımyn. Ózim áıel zaty bolǵandyqtan, qazaq qoǵamyndaǵy áıeldiń rólin de tereńirek kórsetkim keledi. Meniń doktorantýralyq jumysymnyń ózegi qazaqstandyq áıel rejısserdiń kınodaǵy róli jaıynda aıtapqshy oıym bar.
Óz fılmderińiz arqyly qazirgi qoǵamdy qaı qyrynan kórsetkińiz keledi?
«Adamnyń kúni – adammen» deıdi. Adamdar arasyndaǵy ózara qarym-qatynasty kıno tili arqyly kórkemdik sheshimmen kórsetýdi basty mindet retinde qarastyramyn. Onymen qosa, qazirgi táýelsiz memleket Qazaqstandy sheteldik kórermenderge jańa qyrynan kórsetkim keledi, elimizdiń qanshalyqty kórikti ári halqymyzdyń qanshalyqty dana ekenin ashyp aıtqym keledi.
Suhbattaryńyzǵa kóp rahmet! Qolǵa alyp otyrǵan jobalaryńyz deńgeıi joǵary fılm bolyp shyǵýyna shyn tilektespiz. Sizderdeı talantty da talapty rejısser, senarııterden úmitimiz mol. Sáttilik bolǵaı!
