«Ańshy», «Aqsýat», «Baýyr» syndy kınokartınalarymen kórermen qaýymǵa etene tanys, qazaq kınosyndaǵy «Jańa tolqyn» aǵymynyń ókili, belgili rejısser Serik Aprymovtyń «Ákege qońyraý shalý» atty taǵy bir jańa týyndysy kópshilikke jol tartty. Fılmdegi bir erekshelik Serik Aprymov prodıýserlik, rejısserlik jáne operatorlyq jumystardy ózi atqarǵan. Kórkem fılmniń senarıin de ózi jazyp, ekranǵa eksperımettik baǵytta jańa týyndy alyp keldi.

Fılmdegi oqıǵa Erkin esimdi bala turatyn qazaq aýylynda bolǵan. Dáriger oǵan PDB degen dıagnoz qoıady da, qarapaıym mektepke de bara almaıtyndyǵyn aıtady.

Erkinniń anasy aýrý balamen turmys tapshylyǵyna shydaı almaı, oǵan qosa úlken ulynyń qazasynan keıin úıden ketip qalady, al Erkin ákesimen qalyp, oǵan árdaıym kirpish satyp, tabys tabýyna kómektesedi. Ákesi ishkilikke jaqyn edi... Erkin óz qatarlastarynan artqa qalǵandyǵyna qaramastan qalaǵa barýdy armandaıdy, balalar úıinde jatyp, bilim alǵysy keledi.

Árıne, fılm kórermenge tereń oı, erekshe áser bergisi keledi. Degenmen, nesimen erekshe degen suraqqa toqtalsaq. Shym-shytyryq oqıǵa, kúrmelgen máseleler. Iaǵnı, otbasylyq qundylyqtardy sóz etip, keıipkerdiń ishki álemin barynsha aqtara alǵandyǵy. «Ómir» deıtin synaqtan qarapaıym otbasyna berilgen aýyr soqqy. Otbasynyń uıytqysy dep biletin áıel beınesi bul fılmde jıirkenishti kórsetilgen. Onyń dáleli, anasy otbasyn qıyn sátterde tastap, basqa erkekke ketýi, baýyr eti balasyna jek kórinish sezimin ashyq bildirýi, meıirimnen maqurym kúı keshýi jáne joldasymen yzaǵa toly qarym-qatynas. Al, kerisinshe munda araqqumar bolsa da, áıeliniń kóńilinen shyǵa almaıtyn kúıeýdiń obrazy – «áke» beınesi joǵary deńgeıde ashylǵan. Ákesi Erkindi saqtaı bildi. Oǵan mysal: balasynyń oqı almaıtynyna senbeýi, ulyn qandaı jolmen bolsa da oqytqany jáne «Balama tıiskenderdiń barlyǵyn qyramyn» degen sózi. Sondaı-aq ákesi bala armanynyń oryndalýyna jol ashty.

Fılmniń basty keıipkeri Erkinniń ishki dúnıesiniń jaı-kúıin rejısser eki beınelik kórinispen ashyp beredi. Onyń birinshisi, bala Erkinniń ómirindegi tereńdik pen quldyraý sátin tereń jardyń shetimen kórsetken. Al, ekinshisi balanyń qalyptasý kezeńin aýrý ekenin bilgen Erkin men qalaǵa oqýǵa ketetin Erkinniń arasyndaǵy ákesine kómektesýi arqyly jınalǵan kirpishpen baılanysty. Sebebi, kirpishter tazalanyp, qaz-qatar jınalyp satýǵa shyǵarylǵan kezde uly da armanyna bet túzep qalaǵa ketedi. Fılmniń ón boıynda bas keıipkerdiń qınalysyn kóremiz. Biraq, qınalǵany Erkinniń túrinde emes, onyń barlyq is-áreketterinde. Iaǵnı, mekteptegi jaǵdaılardan sharshaýy, sońǵy ýaqyttarda ákesiniń kóp ishimdikke bet burysynan qınalasy, taǵy da basqa qıyndyqtar kezinde aǵasynyń elesin kórýi, onymen tildesýi baýyrǵa degen saǵynyshty da kórsetedi.

Jalpy kınotýyndynyń maǵynalyq jaǵynan tereńdigin joǵaryda aıtylǵan oılardan baıqaýǵa bolady. Deıturǵanmen, fılmniń ortalarynda kezdesetin ýaqyttyń ótýin jáı ǵana qara ekranǵa «6 jyl ótti», «20 jyl ótti» degen jazýlarmen shyǵarmaǵan durys bolar edi. Kóptegen álemdik, otandyq kınorejısserler ýaqyttyń ótkenin túrli kadrlarmen keremet kórsete bilgen. Iaǵnı, sol jazýlar fılmniń atmosferasyn qurtyp tur. Tipti 20 jyl ótti dep bas keıipker ǵana ózgerip, qalǵan keıipkerlerdiń sol qalpynda, sol kıimmen júrýi fılmniń basynan alǵan barlyq áserińdi joıady. Degenmende, rejısser qoǵamymyzdyń jandy jerin nysanaǵa alyp, aýrýyn kórsete aldy. Kóterip otyrǵan másele osy taqyryptyń tóńireginde shalys basqan ata-analardyń keýdesindegi barlyq óksikti jınap alyp, urpaqtar ómiriniń mańyzdylyǵyn ashyp berdi.