Kórsetilim aıasynda 2017 jyldyń sońynda óndiriske jiberilgen fılmder, olardyń qatarynda: «Asan» (rejısseri Berik Jahanov), «Shyrǵalań» /«Jut» (rejısseri Jandos Espenbetov), «Sońǵy muǵalim» / «Terpımost» (rej. Alen Rahmetalıev), «Ózgeris» / «Tıýbeteıka» (rej. Arman Baımuratov), «Tyǵylmaq» (rej. Venera Kaıyrjanova) kartınalary kórsetildi.
Kórsetilimnen keıin fılmderdiń rejısserleri, Sh.Aımanov atyndaǵy «Qazaqfılm» AQ-y «Debıýt» shyǵarmashylyq-óndiristik birlestiginiń jetekshisi Anar Qashaǵanova men atalǵan birlestiktiń kórkemdik jetekshisi Dárejan Ómirbaevtyń qatysýymen baspasóz otyrysy ótti.
Baspasóz konferenııasy barysynda birlestiktiń jetekshisi Anar Qashaǵanova bul kórsetilimniń basty maqsaty – jas rejısserlerdiń jumystaryn qoldaý ári yntalandyrý, óskeleń kınematografısterdiń debıýttik fılmderine qyzyǵýshylyq arttyrý ekenin aıtty.
- «Debıýt» shyǵarmashylyq-óndiristik birlestigi jyl saıyn otandyq kınematografty birqatar jańa esimdermen tolyqtyryp otyrady. Bizdiń birlestikte túsirilgen qysqametrajdy fılmder halyqaralyq kınofestıvalderde laıyqty baǵasyn alyp, marapattarǵa qol jetkizip jatyr. Mysaly «Asan» jáne «Tyǵylmaq» fılmderi mamyrdyń 8-i men 19-y aralyǵynda Franııada ótken Halyqaralyq Kann kınofestıvaliniń Short Film Corner baǵdarlamasy aıasynda kórsetildi. «Tyǵylmaq» fılmi jaqynda ǵana ótken «Eýrazııa» jáne «Ertis sınema» kınofestıvalderinde de baq synady, - dedi Anar Qashaǵanova.
Aıta ketelik, «Qazaqfılm» kınostýdııasy bıyl da senarııler baıqaýyn jarııalaǵan bolatyn. Baıqaýǵa 80-nen astam jumystar túsip, onyń 10-yn irikteý komıssııasy tańdap alǵan. Nátıjesinde Sh.Aımanov atyndaǵy «Qazaqfılm» AQ-y «Debıýt» shyǵarmashylyq-óndiristik birlestigi tómende kórsetilgen on qysqametrajdy fılmderdiń avtorlarymen óndiris boıynsha kelisim jasasty:
«Statýsy: bos emes» (rej. Mádı Baljanov), «Juldyzdar» (rej. Beksýltan Ánýarov), «Paıdasyz jaratylystar» (rej. Jánibek Murtazın), «Dombyra» (rej. Ramazan Halıolla), «Jıýl Vern týraly emes» («Sary kóılek», rej. Talǵat Ábishev), «Mýza» (rej. Arman Qaıyrjan), «Qos aǵash» (rej. Rahymjan Qaldygóz), «Tıyn» (rej. Murat Esjan), «Tamyz» (rej.Jandos Kusaıynov) jáne «Tynyshtyq áni» (rej.Baǵlan Kudaıberlıev).
Irikteýden ótken senarıılerdiń annotaııalary:
«Paıdasyz jaratylystar»
Senarıı avtorlary: Jánibek Murtazın, Baýyrjan Moldashbaev.
Rejısseri: Jánibek Murtazın
Jańa fılm túsirýge bel býǵan eki er adam týraly baıandaıdy.
«Juldyzdar»
Senarıı avtory: Asqar Abdollaev
Rejısseri: Beksultan Ánýarov
Tún jamylǵanda kishkentaı qyz aǵyp bara jatqan juldyzdarǵa qarap armandaıdy.
«Tamyz»
Senarıı avtory jáne rejısseri: Jandos Kusaıynov
Fılm postkeńestik kezeńde oblys qalalarynyń birinde turatyn bala týraly. Ol basyna túsken qıyndyqtardy sheshýge bel býady.
«Statýsy: bos emes»
Senarıı avtory jáne rejısseri: Mádı Baljanov
Súıgen qyzynyń júris-turysyn únemi qadaǵalaıtyn er jigit týraly fılm.
«Dombyra»
Senarıı avtory: Ramazan Halıolla, Janat Jaılybaı
Rejısseri: Ramazan Halıolla
Fılmde 8 jastaǵy Ahmet esimdi balanyń ómiri baıandalady. Dombyranyń qulaǵynda oınaıtyn ol Áıgerimniń sulýlyǵyna tamsanyp júrip, aspabyn joǵaltyp alady.
«Qos aǵash»
Senarıı avtory: Shyńǵys Mamanov
Rejısseri: Rahymjan Qaldygóz
Jol apatynan zardap shekken otbasy týraly fılm.
«Jıýl Vern týraly emes» («Sary kóılek»)
Senarıı avtory: Ádil Nurmuhambetov
Rejısseri: Talǵat Ábishev
Anasymen aýylyna oralǵan bala dosyn izdep aýyldy aralaıdy. Biraq bul kezdesý ol oılaǵandaı bola ma?
«Tynyshtyq áni»
Senarıı avtory jáne rejısseri: Baǵlan Kudaıberlıev
Qazaq KSR-niń ortalyǵy, 1940 jyl. Eki er adam dalada jalǵyz turǵan qazaq úıge kelip, bastyqtarynyń tapsyrmasyn oryndamaqshy.
«Tıyn»
Senarıı avtory jáne rejısseri: Murat Esjan
Qaıtys bolǵan ákesin qaıtaryp almaq bolǵan bes jastaǵy bala týraly oqıǵa.
«Mýza»
Senarıı avtory jáne rejısseri: Qaıyrjan Arman
Fılmde ishimdikke salynyp, jumysynan aıyrylǵan Sáken esimdi kompozıtordyń taǵdyry baıandalady. Bir kúni ol súıiktisin kezdestiredi. Alaıda onyń ómiri ózgere me?