Grantqa ıe bolǵan kınogerler beldi rejısserlerdiń jetekshiligimen ótetin semınarlarǵa, sheberlik saǵattarǵa qatysý úshin kelesi jyly qańtardyń 2-si men 23-i aralyǵynda Los-Andjeles qalasyna attanady. Jeńimpazdar Film Independent uıymdastyrýymen bilim berý baǵdarlamalaryna, kórsetilimderge, sondaı-aq jyl saıyn ótkiziletin 76-shy «Altyn Globýs» saltanatyna qatysady.
Sonymen qatar, Toronto kınofestıvalindegi «Platforma» konkýrstyq baǵdarlamasynyń jeńimpazy anyqtaldy. Bul baıqaýdyń basty júldesi rejısser Ho Vı-Dınnyń «Baqytty qala» fılmine buıyrdy. Al Emır Baıǵazınniń «Ózen» fılmi qazylar alqasynyń qurmetti atalymyna ıe boldy.
- Festıval barysynda biz 12 fılmdi kórip tamashaladyq. Avtorlyq kınonyń bolashaǵy senimdi qolda ekenine úmitimiz zor. Sondyqtan da jeńimpazdy anyqtaý bizge qıyn boldy. Qazylar alqasynyń atynan (Bela Tarr, Mıra Naır, Lı Chang-don) Emır Baıǵazındi jáne poezııalyq oqıǵasy bar, baýrap alatyn kórinisteri bar, aıryqsha ádemi túsirilgen «Ózen» fılmin erekshe atap ótkimiz keledi, - dedi sahna tórinen festıvaldiń «Platforma» baǵdarlamasy qazylar alqasynyń múshesi Lı Chhan Don.
Otandyq kınotýyndy týraly qazylar alqasynan resmı baspasóz-stetmentinde: «Dálme-dál jáne muqııat qolóner kómegimen shyqqan erekshe týyndy bizdi qatty qyzyqtyrdy. Fılmdegi vızýaldy kórinister jáne onyń batyl da shydamdy baqylaý stıli kóńilińdi birden baýrap alady» delingen.
Aıta ketsek, Screendaily basylymy uıymdastyrǵan halyqaralyq kınosynshylar reıtıngi boıynsha «Ózen» fılmi jáne argentınalyq rejısser Benjamın Naıshtattyń «Roho» fılmi 1-shi oryndy ıelendi.
Esterińizge sala ketsek, Aslan týraly trılogııanyń sońǵy bólimi -
«Ózen» fılmi órkenıetten alys jerde turatyn, qaladan kelgen qonaqtan keıin ómirleri kúrt ózgere bastaǵan bes aǵaıyndy týraly baıandaıdy. Fılmniń túsirý jumystary Ońtústik Qazaqstan oblysynda júrgizildi.
Fılmniń jaryqqa shyǵýyna birneshe memleketter atsalysty, olar: Qazaqstan (QR Mádenıet jáne sport mınıstrligi, Sh.Aımanov atyndaǵy «Qazaqfılm» AQ, Emir Baigazin Production), Norvegııa (Norsk Filmproduksjon) jáne Polsha (Madants).