«Tulpar» júldesiniń marapattaý rásimi keshe, qyrkúıektiń 19-nda Almaty Film Festival kınofestıvaliniń jabylý saltanatynda ótti.
Ulttyq kınematografııa óneri men ǵylymdary akademııasynyń barlyq múshesi qatysqan jabyq daýys berý qorytyndysy boıynsha, «Oralman» kartınasy úzdik fılm bolyp tanyldy. Odan bólek, fılmniń rejısseri Sábıt Qurmanbekov úzdik rejısser, al basty róldi somdaǵan akter Dýlyǵa Aqmolda úzdik akter atandy. Sondaı-aq «Úzdik senarıı» atalymy boıynsha fılmniń senarıı avtorlary Nurlan Sanjar men Sábıt Qurmanbekov marapattaldy. «Úzdik sýretshi» júldesi fılmniń qoıýshy sýretshisi Rýstam Odınaevqa tabystalsa, «Úzdik kompozıtor» júldesi «Oralman» fılminiń mýzykasyn jazǵan Aıdos Saǵatovqa buıyrdy.
Al qalǵan júldeler rejısser Aqan Sataev túsirgen «Ona» fılmine tabystaldy. «Úzdik aktrısa» nomınaııasynda Aısulý Ázimbaeva jeńiske jetse, «Úzdik operator» júldesimen Azamat Dýlatov marapattaldy.
Kınematografııa salasyndaǵy ulttyq «Tulpar» júldesin otandyq kınematografty qoldaý, mádenı erekshelikti jáne ulttyq kınoındýstrııa negizin saqtaý, jergilikti jáne halyqaralyq jurtshylyq arasynda qazaqstandyq úzdik jumystardy nasıhattaý maqsatynda qurylǵan bolatyn. Atalmysh júlde kınematografııanyń jáne otandyq kınonyń damýyna kórnekti úles qosqan jetistikteri úshin beriletin kásibı marapat bolyp tabylady.
Bıyl «Tulpar» júldesinde 2017 jyldyń 1 qazany men ústimizdegi jyldyń 30 qyrkúıegi aralyǵynda kórermen nazaryna usynylǵan nemese prokatqa shyǵýǵa josparlanǵan qazaqstandyq kórkem, derekti jáne anımaııalyq fılmder irikteýden ótti.
Esterińizge sala ketsek, «Oralman» fılmi týǵan jerinen ketýge májbúr bolǵan, alaıda ondaǵan jyldar ótken soń Aýǵanstannan eline qaıta oralǵan qandastarymyz jaıly baıandaıdy.
Atalǵan kınotýyndy Irannyń astanasy Tegeranda ótken 35-shi Halyqaralyq Fadjr kınofestıvali men XIII Halyqaralyq «Eýrazııa» kınofestıvaliniń Bas júldesin jeńip alǵan bolatyn. Fılmde basty róldi somdaǵan akter Dýlyǵa Aqmolda qyrkúıek aıynda Tatarstanda ótken XIII Halyqaralyq musylmandar kınosy festıvalinde «Úzdik er adam róli» júldesimen marapattaldy. Sondaı-aq, kartına Italııada ótken HH Halyqaralyq «Religion Today» kınofestıvalinde «Úzdik fılm» nomınaııasynda jeńiske jetip, táýelsiz SIGNIS qazylar alqasynyń arnaıy júldesin ıemdendi. Odan bólek, Germanııada ótken 66-shy Halyqaralyq Mangeım-Haıdelberg kınofestıvalinde «Oralman» fılmi úzdik jetistikteri úshin arnaıy júldemen marapattaldy. Aqpan aıynda atalǵan kınotýyndy Nepalda ótken 22-shi halyqaralyq kınofestıvalde «Sheteldiń úzdik fılmi» júldesin ıemdengen bolatyn. Ústimizdegi jyly sáýir aıynda «Oralman» fılmi Bishkekte ótken «Aq Ilbiris» ulttyq kınojúldesiniń eki marapatyna qol jetkizdi. Fılm «Ortalyq Azııanyń úzdik fılmi» júldesimen, al kartınada basty róldi somdaǵan akter Dýlyǵa Aqmolda «Ortalyq Azııanyń úzdik akteri» júldesimen marapattaldy.
«Oralman»
Fılm HH ǵasyrdyń 30-shy jyldary qyzyl áskerdiń jendetterinen Aýǵanstanǵa qonys aýdarýǵa májbúr bolǵan qazaq otbasy týraly. Bas keıipker Bazarbaı qarttyń bir qyzy men uly sol jaqta dúnıege keledi. Balalary eseıip, otbasyn qurady. Uly Saparqul jergilikti pýshtýn ultynan kelinshek alady. Al qyzy aýǵan jigitine turmysqa shyǵady. Saparqul soǵys kezinde modjahetter jaǵynda soǵysady. Jyldar ótedi. Bazarbaıdyń otbasy Qazaqstanǵa kóshýge ruqsat beretin kvota alady. Barlyǵy jolǵa jınalady. Taýly qyshlaqtan shyqqan otbasyny uzaq jol kútedi.
Óndirýshi: Sháken Aımanov atyndaǵy «Qazaqfılm» AQ, «Qadam» JShS (kınokompanııa) qatysýymen
Janry: áleýmettik drama
Rejısseri: Sábıt Qurmanbekov
Senarıı avtory: Nurlan Sanjar, Sábıt Qurmanbekovtiń qatysýymen
Qoıýshy operatory: Mars Ýmarov
Qoıýshy sýretshisi: Rýstam Odınaev
Kompozıtory: Aıdos Saǵat