Ádilhan Erjanovtyń "Álemniń erke enjarlyǵy" fılmi Franııada DVD-ge shyqty. Dıstrıbıýtor Arizona Distribution franýz kompanııasy. Alǵashqy tıraj 1500 danany qurap otyr, onyń 400-i Franııanyń qoǵamdyq jáne bilim berý mekemelerine, atap aıtqanda, kitaphanalarǵa túsedi. Qalǵan danalary Franııanyń búkil aýmaǵy boıynsha iri jáne orta saýda ortalyqtarynda satylymǵa tústi. DVD-dy sondaı-aq osy saýda ortalyqtarynyń onlaın-dúkenderi arqyly, Arizona Distribution kompanııasynyń onlaın-dúkeni arqyly satyp alýǵa bolady. Sonymen birge, DVD-ge bonýs retinde Erjanovtyń 2014 jylǵy "Úkili Kámshat" (The Owners) fılmi qosa berilgen.
Arizona Distribution kompanııasy Arizona Productions kompanııasynyń enshiles bóligi bolyp tabylady, bul kompanııa Short Brothers kompanııasynyń qatysýymen Astana Film Fund-pen birlesip "Álemniń erke enjarlyǵy" fılmin shyǵarýǵa qatysqan. Fılmniń bas prodıýserleri Aqan Sataev pen Ernar Qurmashev. Esterińizge sala ketsek, fılmniń álemdik tusaýkeseri Franııada – 71-Kann kınofestıvaliniń "Erekshe kózqaras" konkýrstyq baǵdarlamasynda ótti. Kartına budan ári búkil álem boıynsha kóptegen bedeldi festıvaldarǵa qatysyp, marapattarǵa ıe boldy. Sonyń ishinde "Úzdik fılm" jáne "Úzdik senarıı" sanattarynda Asian Pacific Screen Awards syılyǵyna nemese "azııalyq oskarǵa" usynylǵan bolatyn. Sondaı-aq, "Álemniń erke enjarlyǵy" bedeldi reseılik "Nıka" syılyǵyna da usynyldy.
"Franýz áriptesterim men kórermenderdiń fılmime qyzyǵýshylyq tanytqanyna qýanyshtymyn. Jáne de "Úkili Kámshat" fılminiń bonýspen júrip jatqanyna da rızamyn – sebebi bul eki fılm bir-biriniń aıyrmashylyqtaryna qaramastan kóńil kúıi men formasy jaǵynan óte uqsas", – dedi Ádilhan Erjanov.
Kartına alys aýyldan Astanaǵa kelgen ǵashyq juptyń oqıǵasyn baıandaıdy. Saltanattyń otbasy úlken qaryzdarǵa batqan. Bul túıin keıipkerdi úlken tańdaý aldyna alyp keledi. Tabysynyń azdyǵyna qaramastan, Qýandyq ǵashyǵyna kómekteskisi keledi. Ózindik qatal zańdary bar qala jas ǵashyqtardaǵy barlyq qundy dúnıelerdi tas-talqan etedi, biraq Qýandyq pen Saltanat oǵan barlyq kúsh-jigerimen qarsy turýǵa jáne óz mahabbattaryn saqtaýǵa tyrysady.
