«Qazaqfılm» rejısseri Sanam Revaevanyń «Qalybek Qýanyshbaev. Sahna perisi» derekti fıliminiń tusaýyn kesti.
Kınotýyndynyń tusaýkeserine Qalybek Qýanyshbaevtyń týystary men jaqyndary, sondaı-aq akterdyń kózin kórgen KSRO halyq artısi Asanáli Áshimov qatysty.
Fılmniń basty jáne jalǵyz keıipkeri – Qazaq kásibı teatr óneriniń negizin qalaǵan alyptardyń biri Qalybek Qýanyshbaev. Daryndy qazaq ártisiniń qoıylymdary tipti qazaq tilin bilmeıtin Máskeý jurtshylyǵyn da tań qaldyrǵan. Oqıǵa jelisi arnaıy bilimi joq bolsa da kórermenniń júregine jol tapqan keremet daryndy «dala akademıginiń» ómiri men ónerdegi joly týraly.
Fılmniń rejısseri Sanam Revaeva T.Júrgenov atyndaǵy QazUÓA «kórkem fılm rejıssýrasy» mamandyǵy boıynsha bilim alǵan, biraq ol árdaıym akterlik ónerge qyzyqqan jáne stýdent kezinde ózin aktrısa retinde dáleldep úlgerdi. Ol qazaqstandyq kórermenderge «Qazaq halqynyń salt-dástúrleri» fılmderindegi, «Shegirtke», «Áseldiń dostary men qurbylary», «Dostar» hıkaıalaryndaǵy, sondayı-aq áleýmettik, jarnamalyq jáne mýzykalyq rolıkterdegi rólderimen tanys.
- Fılmdi túsirý kezinde elimizdiń belgili óner qaıratkerlerimen tanystym. Issaparlarda Qazaqstannyń kóptegen ásem jerlerin kórip, murajaılar arqyly tarıhymyzǵa sapar shektim. Bizdiń fılmge negizinen Qalybek aǵamyzdy kórmegen adamdardyń áńgimeleri endi, sondaı-aq keıbir aqparatty elektrondy derekkózderden aldyq. Kartınanyń redaktory Lázıza Kerimqul úlken jumys atqardy. Ol bizdiń keıipkermen tanys bolǵan apany taba aldy. Qýanyshbaev atyndaǵy murajaıdyń dırektory bizge aqparat jınaýda kóp kómektesti. Jalpy, túsirilim kezinde jobamyzǵa aıanbaı kómek qolyn sozǵan jandarǵa alǵysymdy bildiremin! – dedi rejısser Sanam Revaeva.
Senarıı avtory: Lázıza Kerimqul
Qoıýshy rejısser: Sanam Revaeva
Qoıýshy operator: Igor Dorofeev
Kompozıtor: Ǵalymjan Sekeev
Montaj rejısseri: Natalıa Ryblova
Prodıýseri: Aıgúl Cherendınova
Kartınanyń dırektory: Álfııa Tólegeneva