Rejısser Ińkár Ábdirashtyń «Umaı» atty qysqametrli fılmi British International Amateur Film Festival (BIAFF) Halyqaralyq áýesqoılar kınofestıvalinde «Eń úzdik fılm» jáne «Eń úzdik senarıı» nomınaııasy boıynsha top jardy. Atalmysh týyndy is-shara aıasynda baıqaýdyń úzdik fılmderine beriletin Daily Mail baspasynyń arnaıy syılyǵyna da úmitker.
Ókinishke oraı, uıymdastyrýshylar Brıtan araldarynda koronavırýstyń órshýine baılanysty eń aýqymdy áýesqoılar kınofestıvalniń saltanatty keshin keıinge qaldyrýǵa májbúr boldy. Bul týraly kınofestıvaldiń resmı saıtynda bylaı delingen:
«Ózderińiz bilesizder, Ulybrıtanııadaǵy keıbir is-sharalardyń merzimi shegerilip, keıbiri – múlde shektetildi. Mamyrdyń 8-10 aralyǵyna josparlanǵan BIAFF-2020 festıvalin 2020 jyldyń 16-18 qazanǵa aýystyrý týraly sheshim qabyldandy».
Festıval uıymdastyrýshylarynyń ókilderi otandyq kınotýyndynyń túsirilim tobyn jeńisterimen quttyqtap, qazylar alqasynyń oń pikirlerin jiberdi. Olar fılmniń basty róldegi akterleri Almaz Aqylbaı men Gúlnar Sılbaevanyń jumysyn joǵary baǵalady. Sonymen qatar, qazylar alqasy operatordyń kásibı jumysyn, fılmniń montajyn jáne dybystyq súıemeldeýin erekshe atap ótti.
Qazylar alqasynyń atynan Maık Ýıtmen: «Bul birinshi kadrdan-aq kórermenderdi qyzyqtyratyn ádemi fılm. Jeńisterińiz qutty bolsyn!» - dep quttyqtady.
Eske salsaq, Ińkár Ábdirashtyń debıýttik fılminiń jelisi ózimshil aktrısany túbegeıli ózgertetin balalar úıiniń tárbıelenýshisiniń ómirin baıandaıdy. Kartınanyń prodıýserleri Farhat Ábdiraıymov pen Gúlshat Smaǵulova boldy. Fılmdi QR Mádenıet jáne sport mınıstrliginiń tapsyrysymen Sh.Aımanov atyndaǵy «Qazaqfılm» kınostýdııasynyń «Debıýt» shyǵarmashylyq birlestigi túsirdi.
