Mýzykalyq jas kórermen teatrynyń tusaýy kesildi

Mýzykalyq jas kórermen teatrynyń tusaýy kesildi

Súıinshi! Jańa teatr dúnıege keldi. Qallekı teatry jańadan salynǵan keń saraıyna kóship, 30 jyldaı shyǵarmashylyq ujymǵa qara shańyraq bolǵan teatr ǵımaratyn jańadan qurylǵan balań teatr oryn basty. Balań bolǵanda da elimizdiń Bas qalasynda irgetasy qalanǵan balalar men jastardyń rýhanı-shyǵarmashylyq ortalyǵyna aınalatyn biregeı ujymy bolýǵa baǵyt ustaǵan Nur-Sultan qalasynyń Mýzykalyq jas kórermen teatry. Buǵan deıingi balalarǵa arnalǵan qýyrshaq, balalar men jasóspirimderge arnalǵan teatrlar bolǵanymen jas kórermenderge arnalǵan mýzykalyq teatr birinshi ret ashylyp otyr. Teatrdyń alǵashqy tusaýkeser qoıylymy uly Abaı Qunanbaıulynyń 175 jyldyq mereıtoıyna arnap sahnalanǵan M.Áýezovtyń «Abaı joly» roman-epopeıasynyń negizinde Mıras Ábil ınsenırovkasyn jazǵan «Abaı-Toǵjan» mýzykalyq dramasy qoıýshy-rejısser Ashat Maemırovtyń rejıssýrasymen shymyldyǵyn túrdi.

Álemde, qoǵamda bolyp jatqan qanadaı qıyndyqtarǵa qaramastan elimizdiń tórinde teatr ónerine jasalynyp jatqan mundaı nazar, erekshe atap ótýge turarlyq. Qallekı teatry óziniń kópten kútken teatr ǵımaratyna kóshkesin, myna bosaǵan teatrdy basqa mekemege beremiz dese, qala ákiminiń qolyn kim qaǵar edi? Shúkirshilik, olaı bolǵan joq. Qonys jańartqan teatr ornyn jańadan boı kótergen mýzykalyq jas kórermenderdiń teatry basty. 

Búgingi sheshimi ońynan týǵan bul bastamany júzege asyrýshy teatrdyń kórkemdik jetekshisi, rejısser A.Maemırov. Jańa teatrdyń akterleri bolyp T.Júrgenov atyndaǵy Qazaq ulttyq óner akademııasyn osy kisiniń  sheberhanasyn bitirip shyqqan túlekteri men búginde oqyp jatqan shákirtterinen turatyn jastar quraıdy. Jas kórermender teatry ylǵı  jastardan quralǵan teatr bolypty. Bir sheberhananyń túlekterinen qurylǵan teatrlar kórshi elderdiń teatrlary tájirıbesinde jıi kezedesedi. Bizdiń eldiń teatr keńistiginde rejısser Nurqanat Jaqypbaıdyń sheberhanasynan shyqqan «Jastar teatry» da osy negizde túzilip búgingi táýelsiz elimizdiń jetekshi teatr ujymdarynyń qatarynda. Sondyqtan mundaı bastamanyń sátti jobaǵa aınalǵan nátıjeleri búgin tusaýy kesilgen jas teatr úshin de úmit artarlyqtaı tájirıbeler men nátıjelerdi alǵa tartady. Bul bastamalardy esitip, alǵashqy adymyn kýágeri bolǵan qýanyshymyz uzaǵynan bolǵaı deıik. 

Astanalyq mádenıet oshaqtarynyń kartasynda mańyzdy orny alatyn jańa juldyzsha – Nur-Sultan qalalyq Mýzykalyq balalar men jasóspirimder teatrynyń qala mádenı ómirine bereri mol. Bas qala turǵyndarynyń negizgi bóligin jastar quraıtyndyqtan mundaı teatrdyń kórermeni de mol bolaryna senim bar. Jyldan-jylǵa kóbeıip jatqan megapolıstiń kóp sandy búldirshinderi men jasópirimder qajetin óteıtin spektaklder qoıý, solardyń damýy men shyǵarmashylyq órkendeýine tilekshi bola otyryp, teatrdyń barlyq jańa bastamalaryna baıandylyq, shyǵarmashylyq shalqar shabyt, zor tabystar kútemiz.

Bul óner ujymynyń aldynda bolashaqta jurtshylyqtyń yqylasy men qurmetine bólenip nebir dúldúl daryndar men daraboz sańlaqtardyń kıeli shańyraǵyna aınalatyn aıaqqa turý, damý, bıik belesterdi baǵyndyrý mindeti kún tártibinde. Bas qaladaǵy belgili teatr ujymdarynyń ishinde ózindik jolyn taýyp, óz kórermenderiniń júregin jaýlaı alatyndaı, básekelestikte dáleldeýdi qajet etedi. Eń basty negizgi aýdıtorııasy balalar men jastar bolyp esepteletin bul teatrdyń kórermenderine bastalatyn jol da ózindik erekshelikke ıe. Boıynda otanshyldyq  rýhty, adamzattyń, ulttyń ulaǵatty asyl qundylyqtaryn nasıhattaý men sińirýde orasan zor eńbek kútiledi. Halqymyzdyń urpaq tárbıeleýde egetin qundylyqtary teatrdan bastaý alýyna úles qospaqqa, jastardyń boıyndaǵy izgilik pen rýhanılyqqa bastaý bulaǵyn ashýǵa dep bastap jatqan qadamdary quptarlyq. 

Teatr óziniń tusaýkeserine uly Abaıdyń ómirine, bolashaǵyna zor yqpal etken mańyzdy  kezeń ekendigin túsine otyryp sahna perdesiniń ashylýyn asyǵa kútkenimiz anyq. Zaldyń jaryǵy sóngende alystan estilgen jumbaq dybystar úni kúmis tamshylardaı jetigen, shańqobyz, dombyra ózge de dástúrli mýzykalyq aspapaptar ansambliniń súıemelimen shymyldyǵyn túrdi. Jáıimen ashylatyn mýzykalyq teatrdyń sahna keńistiginde tynyshtyq basqan tylsym álemdi kóremiz. Jaıqalǵan ormandaı ıin tirese jas akterlerdiń toby sol tynyshtyqqa, saıraǵan qustar daýsyna elitip tyna qalǵandaı, erekshe áser etedi. Osyndaı daýyl aldyndaǵy beıbit tynyshtyqtan bastalatyn spektakl órimdeı jastardyń hormen oryndaıtyn án bolyp quıylady jáne spektakldiń negizgi kiltin izdegen rejısser A.Maemırovtiń negizgi oı-ıdeıasyn ashýǵa baǵdar silteıdi. 

«Kózimniń qarasy,
Kóńlimniń sanasy.
Bitpeıdi ishtegi,
Ǵashyqtyq jarasy...» - dep basynda barlyq akterlerdiń ýnıson daýysta oryndaıtyn, keıin birneshe daýystarǵa bólinip jalǵasatyn uly Abaıdyń bárimizge belgili ániniń birneshe shýmaǵy oryndalýy barysynda spektakl astaryndaǵy bozbala Abaı, jas Abaıdyń alǵashqy erekshe sezimge toly mahabbat «jarasyn», onyń azamat bolyp qalyptasýǵa baǵyt siltegen ómir baspaldaqtaryn, ósý belesterin ashýǵa jasaǵan qadamyn kóremiz. Munda balalyqtyń bazarynan jigittikke, azamat, tulǵa, aqyn, oıshyl fılosof, tutastaı qazaqtyń Abaıyna aınalatyn basty keıipkerdiń ómir baspaldaǵynyń umytylmastaı bolyp júrekke qashalyp jazylatyn bir sabaǵynyń kýási bolamyz.

Mine sol bozbala Abaıdyń júrek lúpiline qulaq túrgizetin, áserli oqıǵalar legi jas teatrdyń betashar spektakli boldy. Jas Abaıdyń oqýdan elge kelýinen bastalatyn spektakl onyń Toǵjandaı sulýǵa degen oıanatyn názik sezimi, alǵashqy mahabbatynyń, shartarapqa sharq urǵan kóńil qusynyń áserinen týyndaıtyn óleń-jyrlary men syrly án-áýenge aınalyp, kórermenniń júrek qylyn terbetkeni teatrdyń barlyq shyǵarmashylyq quramynyń qatysýymen oınalady. Abaı – akter Aıan Ótepbergenniń oryndaýynda jas Abaıdyń kelisti kelbetimen, boıynda eldiń aqyldy, kórikti qyzdary qulaı ǵashyq bolatyn barlyq qasıetimen kórinedi. Ol somdaǵan Abaıda áli pisip jetilmegen bozbalalyqtan góri salmaqtylyq, sabyrlylyq, raıonaldy oılaýy basym, qalyptasqan jigit Abaıdyń keıipin kórdik. Araǵa kóp ýaqyt salyp elge kelip ákesi Qunanbaımen, anasy Uljanmen, dosy Erbolmen sahnalarynda ózin salmaqty ustaýy, sóz sóıleýinen aınalasy kútkendeı er jetken jannyń is-áreketin kórsek, tentek inisi Ospanmen ótetin sahnalarda Abaıdyń balalyqqa tán qyrlary arakidik kórinip qalady. Onyń qasynda tolyǵymen bala bolyp ketpegenimen jaqsy kóretin  minezdi inisiniń barlyq tentektigin túsinistikpen, aǵalyq meıirimmen qaraıdy. Januıadaǵy ata-ana tárbıesi, molda aldyn kórgendigi onyń bolashaq adamı-shyǵarmashylyq bolmysynyń baspaldaqtary sekildi bere alady. Aıannyń akterlik qyrynan bólek vokaldyq múmkindikteri Abaıdyń tól ánderin oryndaý barysynda jaǵymdy áserler qaldyrdy. Toǵjanmen aradaǵy sezimge toly sahnalarda oryndaýshy shynaı ǵashyq jannyń jan-dúnıesin, «kózben kórýge, ishpen bilýge» múkindik berdi. 

Ol kelse sol jerge órt tıgendeı bolatyn, ózi kishkentaı bolsa da tas jaratyn, tas jarmasa bas jaratyn Abaıdyń inisi Ospanmen spektakldiń atmosferasy jandanyp, sahnadaǵy árekettiń ystyǵy aspandap sala beredi. Úıdiń kenjesi, ortanyń erkesi Ospannyń qoldy-aıaqqa turmaıtyn urynshaq, jáı júrýdi múldem bilmeıtin obrazyn Asylhan Tólepov jasady. Akter sahnadan qoldy-aıaqqa turmaıtyn jyldam árekettiń, aınalasyn is-qylyǵymen úrkitpese tańy atyp kúni batpaıtyn tentektiktiń jilik maıyn shaǵyp ishken jan etip kórsetedi. Ol adamnyń bala kezindegi erkindiktiń sımvoly ispettes eshkimnen jasqaný degendi bilmeı, eshkimnen qaǵý kórmegen minezimen erekshelenedi. Ol osy minezimen aınalasyn mezi qyla otyryp, osy ántek qylyqtarymen aǵasy Abaıǵa da, ákesi Qunanbaıǵa da ózgelerge de súıkimdi.   

Spektaklde aktrısa Sábıra Súgirova oryndaǵan Jazmysh atty keıipker Abaıdyń sońynan erip júretin, bolashaǵyn boljap pishýge, onyń kórgen túsi, elesi, óńi bolyp kelip Abaıdyń mańdaıyna jazylǵan barlyq qıyndyq týdyrǵan sheshýshi sátinde kórinis beredi. Aqyn Qadyr Myrza-Álı jazmysh týraly aıtqanyna nazar aýdarsaq: «... bul ózi aqyl aýmaǵyna syıa bermeıtin qupııa qubylys. Úńilgiń keledi, úńile almaısyń, ustaǵyń keledi, ustaı almaısyń. Synaptaı sýsyp shyǵyp ketedi. ... Áıtse de kórkemdik álemi sonysymen de qyzyq» - degen eken. Mýzykalyq minezdemesi de ózi shamalas  jumbaq keıipkermen rejısser A.Maemırov Abaıdyń jolyn, joly bolmaǵan alǵashqy mahabbatynyń osylaı sheshim tabýy joǵarydan kelgen buıryqpen sheshilgendeı, jerdegi pendesiniń is-áreketi men josparlarlaǵanyn retteıtin tylsym kúshtiń beınesin jasaǵan. Aktrısa artyq áreketi joq, birqalypty qımyldaıtyn Jazmyshqa adamı sezimder men qyzýqandylyqtan ada jansyz, júreksiz obraz jasaǵan. «Anadan alǵash týǵanda...» dep bastalatyn  Abaıdyń tól óleń joldaryn Jazmyshtyń aýzyna salýy, onyń spektakldiń túıindi oı aıtar tusyndaǵy shyǵystary dálel. Bul keıipker fınaldyq sahnada januıalyq birliktiń, túsinistiktiń, shańyraqtyń sımvoly retinde qolyndaǵy jaraly júrekti Abaıǵa, ony kelip qorshap turatyn januıa músheleriniń orta tusyna dińgegi retinde oqylady.

Jańa teatr jumysy qazan aıynan bastalyp trýppaǵa akterler quramyna kastıng ótkizilip, shyǵarmashylyq ujym quramyna 50-den astam ónerli jastar tańdalǵan eken. Sahnany toltyrǵan órimdeı jastardyń aldyńǵy tobynda Kann halyqaralyq kınofestıvaliniń jeńimpazy atanǵan tanymal aktrısa Samal Eslıamova, teatr jáne kıno akterleri Asylhan Tólepov, Aıan Ótepbergen, Ádilhan Makın sekildi esimder alystan men mundalaıdy. Sonymen birge, bul qoıylymnyń mýzykalyq keńesshisi etip qazaqtyń álemdik deńgeıdegi mega-juldyz Dımash Qudaıbergenniń tartylýy da esimderi eldiń aýzynda júrgen tulǵalardyń tartylýymen jasalǵan spektaklge degen qyzyǵýshylyqtyń krigin qyzdyra túsken. Rejısser jańa teatrynyń alǵashqy qadamyna jasaýǵa osyndaı juldyzdy akterlik-ánshilik quramdy shyǵarý arqyly jetkilikti jarnamalyq jumystar jasaǵandyǵyn jáne teatrdyń alǵashqy adymynan bastap aıaqqa turyp keterlikteı pıar-qadamdarǵa barǵanyn kóremiz. Búgingi kúnniń ajyramas kórinisi bolyp keletin mundaı qadamdar jastardyń aýdıtorııasymen jumysta kómekteseri anyq. 

Osy juldyzdy qurammen birge alǵashqy tusaýkeser qoıylymǵa Abaıdyń ákesi Qunanbaıdyń róline  almatylyq belgili teatr jáne kıno akteri Berik Aıtjanovty shaqyrylýy salmaq bere túsken. Bul Qunanbaıdyń kóp emes bolsa da sahnaǵa shyǵysy men júris-turysy, salmaqty sóz saptaýynan eldiń aǵasyn, otbasynyń bárine syıly Ákeni, ósip kele jatqan Telǵarasy men tentek uldaryna degen kózqarasy, peıili túzý sahnadan eńsesi bıik taý tulǵany kórdik. Tentektik jasaǵan Ospannyń shekten shyqqan qylyqtaryna baǵa berip «Alyp ket mynany!»-deıtin tusynda tentektikti tyıǵan Qunanbaı ákeniń buıryqty raıdaǵy qataldyǵyn kóremiz. «Bul án burynǵy ánnen ózgerek ...» - degendeı, bul Qunanbaıda bar sabyrlylyq pen salmaqtylyq, aınalasyna qas pen qabaqtan aıtaryn jetkizetin ótkir janarly kesek tulǵa bolyp shyqqan. Abaıdyń mahabbatyn saqtap qalýǵa, jastyq pen mastyqqa elitip jan jarasyna basý aıtyp sheshim shyǵarǵanda artyq sezimtaldylyqqa barmaıdy. Tek, «Aı, shalaǵaı balam-aı» dep keshirimdi qarap, Ákeniń aıtqany zań bolyp qalaryn aıqaısyz, zilsiz nyq jetkizedi. Bul baılamnyń sońǵy ári qaraı eshqandaı talqyǵa salynbaıtynyn kóremiz.

Abaıdyń anasy Uljan aldyńǵy jyldar qoıylymdarynda teatr sahnasynan kóp oryn berilmeı kelgen keıipkerlerdiń biri. Bul ınsenırovkada da Uljanǵa kóp oryn berilmese de uly Telǵaranyń basynan ótetin negizgi oqıǵalar leginde, kórinisterde balasynyń janynan tabylady. Tanymal Samal Eslıamovamen ol oryndaǵan Uljan ana beınesinde qazaq teatrynyń sahnasynda alǵash ret júzdestik. Biz tamashalaǵan aktrısanyń Uljan rólin oryndaýda kórermenge negizgi aıtpaǵy qara shańyraq – januıanyń uıytqysy Analar jaıynan syr shertedi. Analar alyptar men ǵulamalardy dúnıege alyp kelýmen birge olardy baǵyp-qaǵatyn erkeletip meıirim shapaǵatyna bóleıtin, qınalǵanda qoltyǵynan demeıtin, balasynyń jetistigine birge qýanyp, muńyn birge bólisetin ul men qyzdyń ómirdegi eń jaqyn adamy jaıly syr shertedi. Aktrısanyń jumsaq, tebireniske toly daýys ıirimi, ulymen alǵash kezdeskendegi «Paı, paı, paı barlyqtaryń silekeılep balamnyń betinen súıetin jer de qaldarmadyńdar! Abaıjanym! Qońyr qozym!» degen alǵashqy sózderinde Ana boıyndaǵy ulyna degen saǵynysh, súıinish, maqtanysh sezimderimen qatar kórinedi. Nemese, Toǵjan jaıly jańalyqty estı sala el jurtqa dabyralaýyna asyqqan Ospanǵa qarata Ananyń: «Abaıǵa emes, saǵan qalyńdyq alyp berý kerek. Sonda esińdi jınaıtyn shyǵarsyń. Boldy endi, boldy» - dep toqtaý aıtatyn tusynda aktrısa ishki sezimi túrli daýys palıtrasymen qatqyldana bastalyp aıaǵynda «boldy endi, boldyǵa» kelgende sabasyna túsip úlgerýinen Uljan ananyń ról jelisin qarapaıym da ornyqty berýge tyrysqan kásibı oryndaýshynyń sheberligin kóremiz. 

Qoıýshy-sýretshi Alma Syrbaeva sahnalyq qoıylymnyń dekoraııalyq sheshimi qarapaıym bezendirilgen. Shaǵyn sahna keńistiginde oryndalar mýzykalyq drama qarapaıym sahnalyq bezendirilgen sheshimdermen berilgen. Negizgi sahnalyq áreketterdiń túgelge jýyǵy qońyr tústes bir boıaýly keńistikte ótip, Abaı men Toǵjannyń jeke qalǵan sátterine akterlerdiń is-áreketine sezimtaldyq, romantıkalyq boıaý berýge aq tústes matalardan jolaqtar túsirgen. Bul birsaryndy keńistikti jaryq berý quraldarymen jandandyrý úshin biraz jumystar jasalǵan desekte, spektakldiń syrtqy kıiminiń áshekeılerin tolyqtaı ilip úlgermegendeı áserde qaldyq. Bul qarama-qaıshy kóńil-kúıdegi, kontrastyly oqıǵa oryndar sahnalarynyń oryn aýstyrýlarynda, Abaı men Toǵjannyń, Abaı men Erboldyń sahnanyń tórinde turyp, Toǵjan men Kerimbalanyń aldyńǵy sheptegi dıalogtaryn kezektestire jaryqpen qamtýlaryndaǵy jumystarynyń sylbyrlyǵynan kórindi.  

Teatrdyń aty men ustanǵan baǵytyna saı alǵashqy spektakliniń de mýzykalyq bolýy zańdylyq. Kompozıtor rólinde spektakldiń mýzykalyq partıtýrasyn jazǵan Baýyrjan Aqtaev Abaıdyń mol án murasy men sol ánderdiń ekinshi túrlerin, A.Jubanov pen L.Hamıdıdyń «Abaı» operasynan (Ajardyń zary) jáne halyq án kúılerinen de keńinen qoldanady. Ult aspaptar ansambliniń atqarýynda usynylǵan mýzykalyq árleýin biz tamashalaǵan jańa spektakldiń quramdas bóligine aınalǵandaı. Sahnanyń eki jaǵyna bóline ornalasqan ansambl músheleri spektakl barysynda oqıǵa jelisine súıemel jasaýda, kópshilik-halyq sahnalaryndaǵy, jekelengen bılerge qurylǵan mýzykalyq kompozıııalardy jigerli oryndaýda kásibılik tanyta aldy. Ansambl ózdiginen spektaklge súıemel jasaýshy top retinde ári árbir mýzykalyq bóliktiń yrǵaqty-úlestik júrisine senimdi súıemeldeý men jetekshilik jasaı aldy. Spektakldiń mýzykalyq partıtýrasynda ánshi Ádilhan Makınge arnap  jazylǵan vokaldyq bólikter jańasha estiledi. Ánshi óziniń mol daýys dıapazonynyń múmkindigi men boıaýyn spektakldiń keıipkerleriniń kóńil-kúı atmosferasyn ashýǵa, sezim pernelerin jalańashtap berýge oryndy qoldanǵan. Jastardyń kórshi aýylǵa baryp oıyn-saýyqqa qatysyp alǵash ret Abaı men Toǵjannyń tabysatyn tusyndaǵy «Kózimniń qarasy» - dep alǵashqy sóıleminen eki jastyń arasyndaǵy ózara túsinistikter bastaýyna erekshe mýzykalyq jol taýyp bergen. Teatrdyń árbir kelesi qoıylymdarynyń negizi mýzykalyq bolatynyn eskersek keleshekte orkestrdiń turaqty orny, olardyń jeke ánshilermen birge kópshilikpen jumys isteýine qolaıly jaǵdaılar, olardyń spektakldegi atqaratyn orny men róline erekshe nazar aýdarýdy qajet etedi. Spektakl tabıǵaty mýzykalyq, jáne oryndaýshylardyń da mýzykalyq bólikterdi oryndaý deńgeıine degen talaptardyń joǵary bolýyn erekshe qadaǵalaý qajet bolmaq.   

Shyryn Mustafınanyń sahnalyq jumysy, kópshilik sahnalardaǵy, bı kompozıııalaryn qoıýdaǵy izdenisterin atap ótken jón. Spektakldiń kópshilik qatysatyn bólikterdi úılestirýde bı mamanynyń jumysy oryndy, barynsha kórinis berdi. Spektakl oqıǵasynyń jelisin órbitýdegi kórinister arasyn túıistirýde Abaıdyń jany men sezim arpalystaryn kópshiliktiń plastıkalyq is-qımyldary arqyly kórsetýdegi baletmeıster men rejısserdiń oryndy jasaǵan jumysyn kóremiz. Desekte, Abaı – A.Ótepbergen men Toǵjan- A.Amangeldıevanyń alǵashqy betpe-bet kelip júzdeskennen keıin ile-shala bolatyn qyzdardyń bıindegi Toǵjannyń birinshi shepte, ortada óner kórsetýinde avtorlyq obraz ben sahnalyq áreketiniń arasyndaǵy sáıkessizdik oryn alǵan sekildi. Bir kórgennen Abaıdyń júregin jaýlaǵan úlbirep turǵan arý Toǵjannyń kelesi sáttegi toppen oryndalar jigerli bı áreketindegi elementteri, óte naqtyly ári belsendi plastıkalyq is-qımyldary qazaqtyń tárbıeli de bııazy Toǵjanyn emes, búgingi kúnniń batystyń tobyrlyq hıp-hop mádenıetinen shyqqan jas qyzdyń áreketin kórsetti. Daýymyz joq, qazaq qyzdary jigitterdiń nazaryn aýdarý úshin olardyń aldynda múmkin osy úlgide belsendi bılegen de shyǵar, Toǵjannyń osy topqa túsip ketip qyzý dene áreketine barýynan ádemi áserimizdi joǵaltyp alǵandaı boldyq. Toǵjannyń sahna tórinde neke sýyn iship aıttyrylǵan jerine kete baratyn kórinisi de buǵan deıingi Abaıdyń boıyndaǵy ǵashyqtyqtyń dertin teń sezinýge, birge bólisýge tıis Toǵjandy bir jaqty keıipker etken. Aktrısa óziniń Abaımen bolatyn negizgi lırıkalyq mahabbat sahnalaryn tartymdy, senimdi etip oryndaı kele Abaıdan aıyrylatyn, mahabatyn salt-dástúr ústemdigine, «ádepten ozbaýǵa» shaqyratyn sezimderimen júregindegi alasaprandy tejeıtin tusynda tolyq sezdire almaǵandaı áser qaldyrdy. Ansambldiń jáne qyzdar horynyń «Abaı» operasynan Ajardyń arııasyn (zary) vokalızben oryndaý barysynda sahnanyń tórinde ótetin uzatylýy, betashar, neke sýyn isher sahnalaryn kórermen alystan baqylap otyryp, neke sýyn irkilissiz ishken Toǵjan qyzdyń áreketine qaraı otyryp Abaıǵa degen sezim bolmaǵandaı sýretter kýási boldyq. 

Hormeıster Ǵalymjan Berekeshevtiń spektaklde eńbegi mol ekendigin kóremiz. Barlyq oryndaýshy akterlerdiń daýystaryn partııaǵa bólip, birneshe daýysqa arnap jazylǵan partıtýrany oryndaýda óziniń kásibı maman ekendigin kórsete aldy. Hormeıster jumysynyń nátıjesi spektakldiń alǵashqy sátinen sońǵy akkordyna deıin kópshilik sahnalarda kórinis berip otyrdy. Trýppanyń jas, áli ózara tolyq úılesimdik pen úndestik taýyp tutastyqta estile qoımaǵan úni ashylady, ǵımarattyń akýstıkasyna úırener kezi alda dep bilemiz. Oryndalatyn ánniń mýzykalyq frazırovkasyna mán berý, dybystyń dınamıkalyq kúsheıýi men báseńdeýin sheberlikpen ıgerý, hormen oryndaýdaǵy mýzykanyń dybysyn úzbeı jalǵaý «epnoe dyhanıe» joldaryn bir adamdaı atqara bilý áli de bolsa ter tógip jumys jasaýdy qajet etedi. Bul hormeısterdiń oryndaýshylardan kúndelikti  talap etiletin jumysy bolýy kerek. 

Jas kórermen, balalar jany erekshe álem. Olardyń búgingi talǵamyna saı keletin spektakl jasaý, olardy sahnada oryndaǵan rólińe sendirý, sahnanyń syıqyr álemine tartý, bul teatrdyń aldynda turǵan turaqty úırený, sheberlikti jetildirý, ushtaý barysynda ıgeriletin qıyn sharýalardyń biri ǵana. Kórermenniń qoıylymdy qabyldaýyna sahnadaǵy keıipkerdiń ústine ilgen kıimi men júris-turysy, keıipker men ony oryndaýshy akterdiń jas mólsheri arasyndaǵy jaqyndyqtar mańyzdy ról atqarady. Teatr talǵampaz kórermenniń senimine kirýge, onyń jany men júregin jaýlaý úshin qolda bar barlyq múmkindikti paıdalaný kerek etedi. Jastarǵa arnalǵan spektakldiń oryndaýshylar quramy, jas mólsherinen bastap barlyq komponenteriniń saıly bolýy te mańyzdy.  

Abaıdyń Toǵjanǵa degen alǵashqy ǵashyqtyq hıkaıatynyń týyndatqan jarasy, bitpegen ishtegi sheri jańa shabyt, jańa izdenisterge jol ashty. Bul qoıylymnyń kórermen úshin tanymdyq hám talǵamdyq bereri, jas akterler úshin alatyn tájirıbe sabaqtary mol. Bas shahardyń rýhanı-mádenı ómirine mazmundy mánerimen qosylyp otyrǵan óner ordasy jas urpaqtyń boıyna rýhanı qundylyqtardy darytyp, otandyq jáne álemdik mýzykalyq qoıylymdardy sahnalaý arqyly balalar men jasóspirimderdiń mádenı-estetıkalyq álemin, tanym-taǵylymyn, shyǵarmashylyq áleýetin jetildirýge ún qosyp óner men mádenıet ákelýiniń mańyzy zor. Teatrdyń jańa bastamalaryna sáttilik tileımiz! Tolaǵaı tabystarymen kórermenderin qýantatyn jastar ónerine Aq jol tileımiz!


Amankeldi Muqan
Teatrtanýshy, ónertaný kandıdaty