Pikirtalasqa 85-ten asa adam – joǵary oqý oryndarynyń, tehnıkalyq jáne kásiptik mekemelerdiń oqytýshylary, horeograftar, qosymsha bilim berý oqytýshylary, Qazaqstan Respýblıkasynyń horeografııalyq ujymdary men teatrlarynyń áıgili baletmeısterleri qatysty.
Kópshilik nazaryna usynylǵan Anyqtamalyq 2018 jyly Akademııa qabyrǵasynda qurylǵan ulttyq bı ǵylymı-zertteý zerthanasynda ázirlengen jáne mamandar men ázirleýshilerdiń atqarýshylyq, pedagogıkalyq, baletmeısterlik, ǵylymı-zertteý jumysynyń nátıjesi bolyp tabylady.
Ázirleýshilerdiń pikirinshe, Anyqtamalyq qazaqtyń halyq bıin tereńdetip oqytý úshin alǵashqy ádebıet kózi jáne ádistemelik materıal retinde ázirlendi. Oqý quralyn qurastyrý barysynda avtorlar barlyq qolda bar derekkózder men arhıvtik beınematerıaldardy muqııat zerttedi, atap aıtqanda, Sh.B. Jıenqulovanyń, D.T. Ábirovtiń, Á.M. Ysmaıylovtyń, G.N. Beısenovanyń, O.V. Vsevolodskaıa-Golýshkevıchtiń, T.O. Izimniń, A.Á. Tátıdiń, A.K. Qulbekovanyń eńbekteri ǵylymı-ádistemelik taldaýdan ótti. Izdeý jumysynda analogtar, qaıtalaýlar, eskirgen materıaldar alynyp tastaldy. Sonymen birge, ázirleýshiler ulttyq bıdi saqtaý jáne horeografııalyq sózdik qoryn molaıtý úshin mańyzy zor, umytylyp qalǵan materıaldardy engizdi.
Anyqtamalyq – mindetti materıaldyń qysqasha mazmuny júıeli túrde baıandalǵan, praktıkalyq maqsattarǵa arnalǵan basylym, sondaı-aq qazaq bıi bólimderin naqtylaý úshin ádistemelik kómek. Ázirleýshilerdiń basty mindeti barlyq bilim berý deńgeıleriniń oqý oryndary úshin beıindik kýrs retinde qazaq bıin keńinen meńgerý úshin biryńǵaı oqý materıalyn anyqtaý boldy.
Talqylaý barysynda respýblıkalyq semınarǵa qatysýshylar áriptesteriniń atqarǵan jumysy týraly óz pikirlerimen bólisti, oqý quralyn jetildirý boıynsha praktıkalyq usynymdar jasap, ózgertýler men usynystar engizdi. Olardyń bári eskerilip, júıelendiriledi jáne Qazaq bıi anyqtamalyǵynyń qorytyndy basylymyna engiziledi.
Aqparat: Qazaq ulttyq horeografııa akademııasy saıtynan.