2021 jylǵy 21 mamyr, saǵ. 11.00-de N. Dáýletova atyndaǵy zalynda belgili kınotanýshy, kórnekti ǵalym, Qazaqstandaǵy kásibı kınotanýdyń negizin qalaýshy, Qazaqstannyń eńbek sińirgen qaıratkeri, «Qurmet» ordeniniń ıegeri, ulaǵatty ustaz Baýyrjan Nógerbektiń ómiri men shyǵarmashylyǵyna arnalǵan «Kınotanýshy Baýyrjan Nógerbek» atty kitaptyń tusaýkeseri ótti.
⠀
Baýyrjan Ramazanuly Nógerbek – búkil sanaly ǵumyryn qazaq kınosynyń ózekti máselelerin zertteýge arnaǵan kórnekti ǵalym. Qazaqstandaǵy kınopedagogıkanyń jáne kásibı kınotaný mamandyǵynyń negizin qalaýshylardyń biri.
Qazaq anımaııalyq, kórkem sýretti kınosyna arnalǵan ǵylymı eńbekteri men otandyq kıno óneriniń damýyna úles qosqany úshin Qazaqstannyń Lenın komsomoly syılyǵymen (1978), KSRO Kınematografıster odaǵynyń syılyǵymen (1985), «Qulager» ulttyq kınematografııalyq syılyǵymen (2008) marapattalǵan.
Kitapta Baýyrjan Nógerbektiń qazaq kıno óneri, onyń qalyptasý jáne damý tarıhy, ulttyq kıno óndirisiniń erekshelikteri týraly ár jyldary baspasóz betterinde basylǵan maqalalary men suhbattary, muraǵat qujattary men fotosýretteri jınaqtalǵan. Sondaı-aq ulttyq kınonyń týyn kótergen kórnekti ǵalym, kınotanýshy, ótkir oıly synshynyń ómiri men shyǵarmashylyǵy, azamattyq ajary men qaıratkerlik kelbeti týraly áriptesteri men shákirtteriniń, dos-jarandary men týǵan-týystarynyń estelikteri berilgen.
Kitaptyń qurastyrýshylary – Baýyrjan Nógerbektiń jary, belgili teatrtanýshy Gúljahan Bekhojına jáne uly, kınotanýshy, PhD doktory, T.Q.Júrgenov atyndaǵy Qazaq ulttyq óner akademııasynyń «Kıno tarıhy men teorııasy» kafedrasynyń doenti Baýbek Nógerbek.
⠀
Onlaın rejımindegi sharaǵa Ózbekstannan, Qyrǵystannan kınotanýshylar, B.Nógerbektiń shákirtteri qatysty. Is-sharany QR Ulttyq kitaphanasynyń dırektory Baqytjamal Qaıyrbekqyzy Ospanova quttyqtaý sózben ashty.
⠀
Keshti B.R.Nógerbektiń shákirti, Qazaqstandaǵy alǵashqy kınotanýshylar sheberhanasynyń (1993-1997) túlegi, aqyn, jýrnalıst «Qazaq jáne Shalqar» radıolary Almaty fılıalynyń jetekshisi Baqyt Jaǵyparuly júrgizdi.
⠀
Tikeleı efırde Z. Bekhojına, G. Ábikeeva, Q. Halyqov, T.Mýkanova, Ǵ. Ábildına, D. Manabaı, B.Qalymbetov, G. Kóbek, N. Muqysheva, G. Tolomýsheva, B. Baýyrjanuly jáne t. b. sóz sóılep, jyly lebizderin bildirdi.
Jyl saıynǵy úzdik kınotanýshy stýdentke taǵaıyndalatyn Baýyrjan Nógerbek atyndaǵy shákirtaqy T.Júrgenov atyndaǵy Qazaq ulttyq óner akademııasynyń II kýrs stýdenti Álıhan Tórenovke tabystaldy.
⠀
Shara aıasynda QR Ulttyq kitaphanasynyń qorynan B. Nógerbektiń ómiri men shyǵarmashylyǵyna arnalǵan «Baýyrjan Nógerbek» atty kitap kórmesi usynyldy.
Qatysýshylar: óner jáne kıno qaıratkerleri, B.Nógerbektiń dostary, otbasy jáne t.b.
29-sáýir kúni Nur-Sultan qalasynda kitaptyń alǵashqy tusaýkeseri ótti.
