Ulttyq kınony qoldaý memlekettik ortalyǵy quqyq qorǵaý organdaryndaǵy sybaılas jemqorlyq týraly ekshn-fılmdi jaryqqa shyǵarady. Prodıýserlerdiń aıtýynsha, «Jaza» kınokartınasy kınoteatrlarda ǵana emes, áleýmettik jeli arqyly da naryqty dúr silkindirmek. Fılmniń rejısseri – Darhan Tólegenov.
Ulttyq kınony qoldaý memlekettik ortalyǵynyń basqarma tóraǵasy Qurmanbek Jumaǵalı kınonyń prokaty men halyqaralyq deńgeıde tanymal etýge qatysty suraqtardy pysyqtaý úshin prodıýser Maksım Akbarovpen kezdesti. Ol basqaratyn Golden Man Media shyǵarmashylyq toby fılm óndirisimen aınalysyp jatyr.
«Buǵan deıin fılmderdiń jarnamasyna qatysty jumysty tek ózimiz atqaratynbyz. Qazir Kınony damytý ortalyǵy tarpynan qoldaý bar, bul – biz úshin úlken kómek. Seılz agent (sales agent) retinde «Nıet» dep atalatyn qazaqstandyq kompanııany jumyldyrdyq. Ondaǵy mamandar amerıkandyq QED International kınodıstrıbıýtorymen seriktestik ornatyp, Bred Pıtt oınaǵan «Qahar» jáne ataqty «№9 aýdan» fılmderiniń satylymymen aınalysqan bolatyn. Endi QED International bizdiń fılmge qyzyǵýshylyq tanytyp otyr. Qazir barlyq múmkindikterdi paıdalana otyryp, Netflix, Amazon, HBO jáne Peacock syndy álemdegi negizgi strımıngtik platformalarmen kelissózder júrgizip jatyrmyz. Bizdiń fılm jaryqqa shyqqan soń, eki taraptyń qaýqaryn kórsete alatyndaı naryqty dúr silkindirýi kerek», – dedi Maksım Akbarov.
Kórermender kınokartınany úlken ekrandardan bıyl kúzde tamashalaıtyn bolady. Qazir saýndtrekterdi tanymal artıster jazyp jatyr, olardyń esimderi fılmniń prokaty qarsańynda jarııalanady.
«Fılmder tabystarǵa jetip, qarjy ákelýi kerek. Ókinishke oraı, shyǵarmashylyq toptardyń keıbiri túsirilim jumystary aıaqtalǵannan keıin kınony qalaı jarnamalap, jaryqqa shyǵarý qajet ekenin nemese strımıngtik platformalarǵa qalaı usynýǵa bolatynyn bilmeıdi. Sondyqtan pıtchıngten keıin biz prokatqa shyǵarý tetikteri men halyqaralyq naryqqa qalaı shyǵýǵa bolatynyn túsindirý úshin kınematografısterge arnalǵan trenıngter uıymdastyrýdy josparlap otyrmyz. Naryqta kınoprodıýserlerdiń tapshylyǵy seziledi», – dep atap ótti Qurmanbek Jumaǵalı.
Aqparatty Ulttyq kınony qoldaý memlekettik ortalyǵynyń baspasóz qyzmeti usyndy