Ózbekstanda «Jibek jolynyń injý-marjany» kınofestıvali aıaqtaldy. Álemdik deńgeıdegi juldyzdar Samı Naserı, Emır Kýstýrıa, Kevın Speısı keshtiń qurmetti qonaqtary boldy.
Jabylý saltanaty Samarqandtyń tarıhı-etnografııalyq «Máńgilik qalasynda» ótti.
Kınofestıvaldiń bes kúninde kórermender 40 túrli kartınany tamashalady. Sonymen qatar 60-tan astam sheberlik synyptar men trenıngterge qatysty. Emır Kýstýrıa, Aleksandr Sokýrov, Frederık Dıfental, Samı Naserı, Kevın Speısı, Alekseı Ýchıtel, Vladımır Hotınenko syndy sheberler tájirıbelerimen bólisti.
Is-shara barysynda Ortalyq Azııa elderiniń kınematografy arasynda ótken baıqaýdyń nátıjeleri jarııalandy. Qazaqstandyq «Aǵaıyndy» fılmi «Úzdik rejıssýrany» ıemdense, Maksım Akbarovtyń «Dala» fılmi «Úzdik debıýt» nomınaııasynda jeńiske jetti. Ádilhan Erjanovtyń «Ademokanyń oqýy» Qazylar alqasynyń arnaıy júldesimen marapattaldy. «Úzdik er adam rólin» Dastan Aıbek (Qyrǵyzstan), «Úzdik áıel adam rólin» Talaıqan Abazova ıemdendi. Festıvaldiń «Úzdik fılm» ataǵy Shokır Holıqovtyń «Jeksenbi» fılmine buıyrdy.
Saltanatty is-sharada festıval prezıdenti Fırdavs Abdyhalıqov Kınematografqa qosqan úlesi úshin Reseıdiń belgili rejısseri Aleksandr Sokýrov, Gúrjistandyq rejısser Iraklıı Kvırıkadze jáne ıtalııalyq Petro Marchellony marapattady. Ózbekstandyq kınorejısser Sahısalıs Baıramov Túrksoıdyń arnaıy marapattyn alsa, Aqtan Arym Qubat Kınematografıster odaǵynyń Altyn Tulpar syılyǵyna ıe boldy. Ózbek kınosynyń damýyna úlesin qosqan úshin Aqbar Bekturlıev marapattaldy.
Festıval úsh jyl buryn prezıdent Shavkat Mırzıeevtiń bastamasymen qaıta jandandy. Atalmysh festıval búkil Ortalyq Azııadaǵy kınoındýstrııanyń damýyna jaqsy serpin boldy.
