8-maýsym, saǵat 18:30-da Ǵ.Músirepov atyndaǵy Qazaq memlekettik akademııalyq balalar men jasóspirimder teatrynda Qazaqstannyń halyq ártisi Báıten Omarovtyń 90 jyldyǵyna arnalǵan eske alý keshi ótedi.
Qazaq kásibı teatrynyń negizin qalaǵan J.Shanın, A.Toqpanov, Á.Mámbetovter syndy alyptardyń qataryn tolyqtyrǵan qaıratker, qazaq-orys teatrlarynda júzden asa spektaklder qoıyp, kıno salasyna da tyńnan túren salǵan birtýar tulǵa, ulaǵatty ustaz, Qazaqstannyń xalyq ártisi – Báıten Omarovtyń týǵanyna bıyl 90 jyl.
Báıten Omarov - 1948 jyly Almaty qalasyndaǵy kınoakterler mektebin, 1954 jyly Tashkent memlekettik teatr-kórkemsýret ınstıtýtyn (jetekshisi I.V. Radýn) bitirdi. Rejısserlik óner jolyn 1953 jyly tuńǵysh ret N.V. Gogoldiń “Úılený” komedııasyn (qazirgi Atyraý oblysy drama teatrynda) qoıýdan bastady. 1954 – 1989 jyly Semeı oblysy drama teatrynda, Uıǵyr memlekettik mýzykaly komedııa teatrynda, Qazaqkonertte, Taldyqorǵan oblysy drama teatrynda bas rejısser boldy. Ol A.Qahardyń “Aýrý tister”, M.Áýezovtiń “Eńlik – Kebek”, “Qaragóz”, Ǵ.Músirepovtiń “Aqan seri – Aqtoqty”, Nazym Hıkmettiń “Mahabbat týraly ańyz”, Gogoldiń “Revızor”, Á.Tájibaevtyń “Maıra”, Q.Muhamedjanovtyń “Bóltirik bórik astynda”, Sh.Aıtmatovtyń “Jámılá” (“Mahabbat joly”), t.b. spektaklderdi sahnaǵa sátti shyǵardy. 1972 jyldan kınoǵa túsip, Badmaev (“Jantalas”, 1972), Aqan (“Daladaǵy qýǵyn”), Bekbosynov (“Qosymsha saýaldar”, ekeýi de 1979), General-gýbernator (“Jylan jylynda”, 1981) Mahmutov (“Alań shetinde”, 1982), t.b. rólderdi somdady.