Búgin «Eýrazııa» kınofestıvaliniń negizgi konkýrsyna qatysatyn fılmderdiń kórsetilimderi bastaldy. Kınofestıvaldiń qazylar alqasynyń quramyna ataqty kınematografıster kirdi. Negizgi konkýrstyń qazylar alqasyn bul jyly FIPRESCI Bas hatshysy Klaýs Eder (Germanııa) basqarady. Fılmderge baǵa beretin qazylar alqasynyń quramynda kınotanýshy jáne mádenıettanýshy Kırıll Razlogov, belgili rejısser jáne senarıst Rýsýdan Glýrdjıdze (Grýzııa), rejısser Elchın Mýsaoglý (Ázirbaıjan), Kann kınofestıvaliniń laýreaty Malılik Súleıman Sısse, otandyq rejısser Talǵat Temenov jáne jas kınotanýshy Aleksandra Porshneva kirdi.
Festıvaldiń alǵashqy kúni negizgi konkýrsqa qatysatyn 13 fılmniń 3-i kınosúıer qaýymǵa usynyldy. Olar: «Kentavr» (Qyrǵyzstan), «Tynyshtyq daýysy» (Úndistan) jáne «Aqymaq qus» (Qytaı). Ár kórsetilimniń sońynda kórermender fılm avtorlaryna óz saýaldaryn qoıyp, oılarymen bólisýge múmkindik aldy.
Sondaı-aq, búginnen bastap qysqametrli fılmder konkýrsynyń kórsetilimi bastaldy. Konkýrsqa qatysatyn 30 fılmniń 6-y otandyq týyndylar. Atap aıtsaq, Darhan Tólegenovtyń «Marshrýt», Jannar Shýraevanyń «Aqyrǵy teńizge», Aıgúl Aqsambıevanyń «Saz–mahabbat», Djýlııa Ǵanıdyń «Kóńildes», Sábıt Ábdıdiń «Ǵaısha» jáne Meıirjan Sandybaıdyń «It» anımaııalyq fılmi.
Kórsetilimder Astana qalasyndaǵy Chaplin Cinemas (Mega Silk Way) kınoteatrynda ótip jatyr.