Ábish Kekilbaevtyń eń tanymal povesi ˗ "Shyńyraý" arqaý bolǵan, rejısser Jańabek Jetirýov túsirgen fılmniń túsirilim jumystary aıaqtaldy. Sh.Aımanov atyndaǵy "Qazaqfılm" kınostýdııasy QR Mádenıet jáne sport mınıstrliginiń tapsyrysy boıynsha túsirilgen bul fılm qazir montajdaý kezeńinde tur.
- Komedııa jáne ekshn janryndaǵy fılmderdiń surnasyqa ıe ekenine qaramastan, Á.Kekilbaevtyń, klassıkaǵa aınalǵan "Shyńyraý" shyǵarmasyn úlken ekrannan kórermen nazaryna usynýdy jón dep taptyq. Bul pálsapalyq kartınada kórinis tapqan kórkem dekoraııalar, kostıýmder jáne kóz toıarlyq ádemi tabıǵat aıasyndaǵy romantıkaǵa toly sahnalar, janýarlar qatysqan sahnalar, Kaspıı teńizi, syrǵa toly Mańǵystaý óńiri eshqandaı kórermendi beıjaı qaldyrmaıdy dep oılaımyn. Menińshe, bizdiń fılm óz ultynyń tarıhynan habardar, klassıkalyq ádebı shyǵarmalardy unatatyn, tereń oılanatyn aǵa býyn men jas býyn kórermenge arnalǵan fılm. Sondaı-aq, bıznesmendermen qatar, qarapaıym eńbek adamdaryna da biraz oı tastaıtyn fılm. Jáne de fılmdi kórgen adam osy óńirge jańasha kózqaraspen qarap, osy aımaqtyń tabıǵatyn saqtap qalýdyń joldaryn qarastyrýǵa yqpal etedi, - dedi fılmniń rejısseri Jańabek Jetirýov.
Rejısserdiń aıtýy boıynsha, fılmniń montajdaý kezeńinde kóptegen jumys atqarylǵan. Olar: dýblderdi tańdaý, sahnalar men epızodtardyń qataryn naqtylaý, sahnanyń jáne jalpy fılmniń rıtmin anyqtaý. Fılmdi dybystap, sahna boıynsha qajetti mýzyka men shý jazǵan. Jáne keıipkerlerdi dybystaý úshin daýystar tańdalyp, kastıng júrgizilgen. Atalmysh kastıńge júz akter qatysqan.
- Kartınada bir qatar dramatýrgııalyq qaqtyǵystar bar. Ol: kózqarastar men senimder qaqtyǵysy, otbasylyq qaqtyǵys, adamnyń ózimen qaqtyǵysy, dúnıetanym qaqtyǵysy, qudyq qazýshylardyń arasyndaǵy qaqtyǵys, túsinispeýshilik. Fılmdegi pikirlester, dostar, odaqtastardyń ózara kelispeýshiliginiń sońy úlken qaqtyǵysqa ulasady jáne tereńine boılaýmaýdyń, sondaı-aq, oryn alǵan jaǵdaıdy qabyldamaýdyń kesirinen kóptegen qıyndyqtarǵa tap bolady.. Fılmniń shıelenisi: áke men bala arasyndaǵy, oı men júrek, mahabbat pen óshpendilik, jańa men eskiniń qaqtyǵysy. Fılmniń bas keıipkerleri – aýyr eńbekten qajyǵan qudyq qazýshy Eńsep, kereń bolsa da, jany izgilikti qalaıtyn, adamı qasıetterge baı Ospan jáne jas qos ǵashyq Aqmonshaq pen Asylhan, - dep rejısser, fılmniń bas keıipkerlerin somdaǵan Aldabek Shalbaev, Asylhan Tólepov jáne jas aktrısa Aıjan Jetirý týraly aıtyp berdi.
Qazirgi tańda fılmniń kompıýterlik grafıkasymen qatar, mýzykalyq árleý jumystary júrip jatyr. Fılmniń mýzykazyn kompozıtor Arman Jaıym jazady. Rejısserdiń aıtýy boıynsha, kartınada kóp klassıkalyq mýzyka jáne kompozıtorlardyń tanymal shyǵarmalarynyń óńdelgen nusqalary bolady.
Fılm jıyrmasynshy ǵasyrdyń basyndaǵy qazaq qoǵamynda qalyptasqan áleýmettik problemalardy qozǵaıdy. Jartylaı otyryqshy jáne kóshpeli turmys keshetin qazaqtardyń arasyn jalǵastyryp júrgen basty keıipker Eńsep shyńyraýdan qudyq qazyp, Ústirtte aty shyǵady. Eńsep baı, aýqatty adamdardyń qudyǵyn qazyp, kedeı kepshikterdiń tapsyrystaryna atústi qaraıdy. Osy tákapparlyǵy ózine kesir bolyp, ol aqyry jumyssyz qalady. Aýylǵa Buhara jaqtan kóship kelgen qalpaq degen bireý, Eńseptiń ornyn basyp, Ústirtte eń tereń qudyq qazady. Bul Eńseptiń qyzǵanyshyn oıatady. Ol odan da tereń qudyq qazam dep, aqyry báseke túbine jetedi.
Derekkóz: http://www.kazakhfilmstudios.kz
