Joba barysynda uıymdastyrýshylar «Akter sheberligi», «Sahna qozǵalysy», «Dástúrli aspaptardy meńgerý», «Keskindeme jáne músin», «Qoltańbaly óner», «Grım jáne sán úlgisi» syndy túrli baǵyttaǵy sheberlik dáristeri arqyly balalardyń rýhanı-mádenı tanymyn keńeıtip qana qoımaı, bolashaqta óner salasyna barýdy kózdegen búldirshinderge bir kún boıy kásibı mamandarmen birge jumys isteý múmkindigin syılap, armandardyń oryndalatynyn, tek sol jolda eńbektený kerektigin túsindirýge tyrysyp baqty.
Budan bólek, jobanyń baǵdarlamasyna «Armandar oryndalady» teatrlandyrylǵan qoıylymy, «Asan qaıǵynyń tolǵaýy», «Saıqymazaqtardyń kórmesi», «Robot» bıi men óleńder negizinde jasalǵan horeografııalyq qoıylymdar, folklorlyq ansambldiń án shashýy, sonymen qatar balalar úıiniń tárbıelenýshilerine arnaıy tigilgen kıim úlgilerin kórsetetin defıle de bolyp ótti.
Joba negizinde uıymdastyrýshylar men qyzyǵýshylyq tanytqan demeýshiler balalardy kúndelikti as mázirinde joq túrli taǵamdarmen, táttilermen qýantyp, jýynatyn bólmege arnalǵan tósenishter men «Arman» kınoteatrynda ótken mýltfılmge bıletter tartý etip, balalarǵa qýanysh pen kóterińki kóńil kúı syılap qaıtty. Qaıyrymdylyq sharalaryn ótkizý aldaǵy ýaytta da óz jalǵasyn taýyp, dástúrge aınalady degen senimdemiz.
