Memlekettik qýyrshaq teatry aqıyq aqyn, qazaqtyń qara óleńin kıe tutqan, júreginiń túbinen qaınap shyqqan asyl jyrlarymen qalyń jurtshylyqtyń mahabbatyna bólengen Muqaǵalı Maqataevtyń týǵan kúnine oraı aqpan aıynyń 6-9 kúnderi aralyǵynda saǵat 17:00-de teatr repertýaryndaǵy «Men dep oıla...» poetıkalyq qoıylymyn kórermen nazaryna usynady. Qoıylymda poezııanyń shyńyna jetken M.Maqataev jyrlary arqyly teatr artısteri qýyrshaqtarmen birge ómirdi súıýdiń ǵajaıyp úlgisin kórsetedi. Poetıkalyq keshte aqynnyń týǵan jer, ómir men ólim, ana men bala, aqyn men aqyndyq, soǵys taýqymeti t.b taqyrybyn qozǵaǵan lırıkalyq týyndylary ulttyq sıpatta kórinis taýyp, qýyrshaqtar arqyly kórermenge jol tartady.
Sondaı-aq, atalmysh kúnderi saǵat 16:00-de teatr ujymy dástúrli túrde ótkizetin «Muqaǵalı – máńgilik ǵumyr» atty aqynnyń óleńderin mánerlep oqýdan jáne aqynǵa shyǵarǵan arnaý óleńderinen saıys uıymdastyratynyn habarlaıdy. Saıystyń sharty boıynsha mektep jasyndaǵy balalar qatysady. Teatrdyń kórkemdik keńes músheleriniń sheshimimen júldeli I, II, III oryndar beriledi.
Memlekettik qýyrshaq teatrynyń «Damý jáne kórermendermen baılanys» bólimi
