Aqtaý qalasynda Qazaqstan Respýblıkasy táýelsizdiginiń 25 jyldyǵynyń
aıasynda Mańǵystaý oblysynyń ákimdigi, N.Jantórın atyndaǵy mýzykalyq drama
teatrynyń uıymdastyrýymen «Ábish álemi» atty Birinshi respýblıkalyq teatr
festıvali ótip jatyr. Atalmysh festıvalde elimizdiń ártúrli aımaǵynan kelgen
teatrlar baq synaýda. Atap aıtsaq, M.Áýezov atyndaǵy Qazaq Memlekettik
akademııalyq drama teatry Ýılıam
Shekspırdiń «Lır patsha» (aýd. Ábish Kekilbaev) tragedııasyn, T.Ahtanov atyndaǵy
Aqtóbe oblystyq drama teatry Ábish Kekilbaevtyń «Hansha-darııa hıkaıasy» dramasyn,
N.Bekejanov atyndaǵy Qyzylorda oblystyq qazaq mýzykalyq drama teatry Sartaı Júsiptiń «Adam bolyp óteıin» dramasyn,
S.Muqanov atyndaǵy Soltústik Qazaqstan oblystyq qazaq sazdy-drama teatry Ábish
Kekilbaevtyń «Mahabbat munarasy» dala balladasyn, N.Jantórın atyndaǵy Mańǵystaý
oblystyq mýzykalyq drama teatry Ábish Kekilbaevtyń «Shyńyraý» dramasyn kórermen nazaryna usynady.
Festıvaldiń arnaıy qonaqtary Noǵaı
memlekettik drama teatry (Daǵystan respýblıkasy, Reseı) Garsıa Lorkanyń «Sýıım em kyıanat» (Dom
Bernardy Alby) dramasyn sahnalap
halyqtyń ystyq yqylasyna bólense, Q.Qýanyshbaev atyndaǵy Memlekettik
akademııalyq qazaq mýzykalyq drama teatry aldaǵy kúnderi Roza Muqanovanyń
«Sarra» dramasyn sahnalamaq.
Al, ónerpazdardyń ónerin baǵalaıtyn qazylar alqasy KSRO jáne Qazaqstannyń halyq
ártisi Asanáli Áshimov, sondaı-aq,
Qazaqstannyń eńbek sińirgen qaıratkeri, atalmysh teatrdyń dırektory
Nurnııaz Muhanov, aqyn, Memlekettik syılyqtyń laýreaty, «Jazýshy» baspasynyń
dırektory Esenǵalı Raýshanov, teatrtanýshy, ónertaný kandıdaty Baqyt Nurpeıis
jáne akter, Jastar Odaǵy syılyǵynyń laýreaty Nurken Óteýilov.