Almaty qalasynyń Memlekettik qýyrshaq teatry respýblıkamyzdaǵy 83 jyldyq tarıhy bar úlken ujymdardyń biri. Qazaq jerinde ótken ǵasyrdyń basynda paıda bolǵan qara shańyraq birneshe býyn jastardy tárbıelep, baldyrǵandardyń jan-jaqty azamat bolyp qalyptasýyna óz úlesin qosyp keledi. Bıylǵy maýsymnyń ózinde «Ana júregi» (avt.E.Ionov, rej.A.Zaıev), «Akva ertegi» (avt.A.Sergeev, rej.O.Aqjarqyn-Sársenbek), «Ana-Jer ana» (avt.Sh.Aıtmatov, rej. D.Jumabaeva), «Toba» (avt.E.Jýasbek, rej.J.Jumanbaı), «Saǵynysh shóbi» (avt.R.Otarbaev, rej.R.Janyamanov) syndy san túrli oqıǵalardy sahnalaıtyn qoıylymdar kórermen nazaryna usynylyp, kópshiliktiń zor qoshemetine bólendi. Óner ordasy ulttyń rýhanı qajettiligin óteýmen qatar, birneshe respýblıkalyq, halyqaralyq festıvalderde top jaryp, qazaqtyń qýyrshaq ónerin órkendetý jolynda tolassyz eńbek etýde. Osy rette, Memlekettik qýyrshaq teatry 21naýryz – Halyqaralyq teatr kúnine oraı alǵash ret 15-18 naýryz kúnderi aralyǵynda «Qýyrshaqtar shaqyrady – 2018» festıvalin ótkizdi.
Osylaısha, dástúrli qýyrshaq ónerin jańǵyrtyp, jas urpaqty izgilik ıdeıalaryna tárbıeleý jolynda eńbek etip júrgen qýyrshaq teatrynyń ujymy bıyl jyl basy, jańarý men jasarýdyń, bereke-birliktiń meıramy – Áz-Naýryzdy erekshe turpatta atap ótpek. Bir aı kóleminde toılatý maqsatynda uıymdastyrylyp otyrǵan ulttyq merekemizdiń aıasynda óner ordasy 14 sáýir kúni, saǵat 20:00-de «Myń bir tún» ertegisiniń jelisi boıynsha Anton Zaıevtiń rejısserligimen «NAÝRYZDYŃ SIQYRLY TÚNI» atty merekelik jańa qoıylymdy kórermen nazaryna usynbaq.
Sharanyń basty ereksheligi – kún batyp, ińir basyp, kesh qonǵanda teatr aýlasyna eki birdeı qazaq aýyldarynyń qonys quryp, haıýanattar baǵy men ırkten sıqyrly ónerpazdardyń kelýi bolmaq. Keshte «Qazaq aýyly» merekelik qoıylym usynyp, ulttyq qundylyqtarymyzdy dáriptese, «Sheberler» aýylynyń keıipkerleri san túrli aspaptarda oınap, olardyń jasalý joldaryn kórsetip, sheberlik saǵattaryn ótkizýmen qatar, jármeńke de uıymdastyrmaq.
Memlekettik qýyrshaq teatry Almaty qalasynynyń turǵyndary men qala qonaqtaryna san ǵasyrlyq dástúrli meıramdy keńinen dáriptep, ádep-ǵurypty ulyqtaý maqsatynda qadirli óner súıer jandardyń janyna rýhanı azyq syılap, kóńil perdesin ádemi kúıge bóleý úshin atalmysh merekeni birge toılaýǵa shaqyrady!
Gúlim KÓPBAIQYZY,
«Ákimshilik jáne aqparat» bóliminiń jetekshisi
