QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen atalmysh fılm týǵan jerinen ketýge májbúr bolǵan, alaıda ondaǵan jyldar ótken soń Aýǵanstannan eline qaıta oralǵan qandastarymyz jaıly baıandaıdy. Rejısseri – Sábıt Qurmanbekov.
Esterińizge sala ketsek, «Oralman» kórkem fılmi Irannyń astanasy Tegeranda ótken 35-shi Halyqaralyq Fadjr kınofestıvali men XIII Halyqaralyq «Eýrazııa» kınofestıvaliniń Bas júldesin jeńip alǵan bolatyn. Fılmde basty róldi somdaǵan akter Dýlyǵa Aqmolda qyrkúıek aıynda Tatarstanda ótken XIII Halyqaralyq musylmandar kınosy festıvalinde «Úzdik er adam róli» júldesimen marapattaldy. Sondaı-aq, kartına Italııada ótken HH Halyqaralyq «Religion Today» kınofestıvalinde «Úzdik fılm» nomınaııasynda jeńiske jetip, táýelsiz SIGNIS qazylar alqasynyń arnaıy júldesin ıemdendi. Odan bólek, Germanııada ótken 66-shy Halyqaralyq Mangeım-Haıdelberg kınofestıvalinde «Oralman» fılmi úzdik jetistikteri úshin arnaıy júldemen marapattaldy. Aqpan aıynda atalǵan kınotýyndy Nepalda ótken 22-shi halyqaralyq kınofestıvalde «Sheteldiń úzdik fılmi» júldesin ıemdengen bolatyn.
Mamyr aıynyń sońynda «Oralman» fılmi Avstrııada ótetin halyqaralyq kınofestıvalde kórsetiletin bolady.
Sonymen qatar «Aq Ilbiris» kınojúldesiniń «Álemdik kınematografqa sińirgen eńbegi úshin» mártebeli júldesi Qazaqstannyń halyq artısi, tanymal akter Nurjuman Yqtymbaevqa tabystaldy.
2012 jyly Qyrǵyzstannyń tanymal kınematografısteri uıymdastyrǵan «Aq Ilbiris» atty tuńǵysh ulttyq kınojúldesi ótken jyldyń úzdik fılmderin anyqtaıtyn eleýli is-shara. Kınojúlde Qyrǵyzstannyń kınematografıster odaǵy, «Aıtysh» qoǵamdyq uıymy jáne Qyrǵyzstan Respýblıkasynyń kıno damytý qory qoldaýymen ótedi. «Ortalyq Azııanyń úzdik fılmi» nomınaııasy 2010 jyly alǵash tabystalǵan bolatyn.
Byltyr QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ «Novyı mır» JShS-niń qatysýymen túsirilgen «Anaǵa aparar jol» fılmi de «Ortalyq Azııanyń úzdik fılmi» kınojúldesimen marapattalǵan edi.
Aıta ketsek, qyrǵyzdyń rejısseri Aqtan Arys Qubat túsirgen «Kentavr» fılmi «Aq Ilbiris -2018» ulttyń júldesiniń bas júldesin jeńip aldy.
Fılm jaıly: Fılm HH ǵasyrdyń 30-shy jyldary qyzyl áskerdiń jendetterinen Aýǵanstanǵa qonys aýdarýǵa májbúr bolǵan qazaq otbasy týraly. Bas keıipker Bazarbaı qarttyń bir qyzy men uly sol jaqta dúnıege keledi. Balalary eseıip, otbasyn qurady. Uly Saparqul jergilikti pýshtýn ultynan kelinshek alady. Al qyzy aýǵan jigitine turmysqa shyǵady. Saparqul soǵys kezinde modjahetter jaǵynda soǵysady. Jyldar ótedi. Bazarbaıdyń otbasy Qazaqstanǵa kóshýge ruqsat beretin kvota alady. Barlyǵy jolǵa jınalady. Taýly qyshlaqtan shyqqan otbasyny uzaq jol kútedi.
Óndirýshi: Sháken Aımanov atyndaǵy «Qazaqfılm» AQ, «Qadam» JShS (kınokompanııa) qatysýymen
Janry: áleýmettik drama
Rejısseri: Sábıt Qurmanbekov
Senarıı avtory: Nurlan Sanjar, Sábıt Qurmanbekovtiń qatysýymen
Qoıýshy operatory: Mars Ýmarov
Qoıýshy sýretshisi: Rýstam Odınaev
Kompozıtory: Aıdos Saǵat