Elordamyz Astana qalasynyń 20 jyldyq mereıtoıy qarsańynda QR Mádenıet jáne Sport Mınıstrligi otandyq kórkemsýret maıtalmandarymen qosa, álem elderinen 20 sýretshiniń qatysýymen «Nur kelbetti Astana» atty Halyqaralyq kórkemsýret kórmesin uıymdastyrmaq. Is-sharaǵa Túrkııa, Japonııa, Franııa, Brazılııa, Úndistan, Ulybrıtanııa, Italııa, AQSh syndy shet elderden úzdik sýretshiler arnaıy shaqyrylady.
Atalmysh kórme aıasynda shet elderden kelgen ataqty sýretshilermen qosa otandyq qylqalam sheberlerine kóktem men jaz mezgilderiniń jaımashýaq kúnderinde, jeke qalaýlary boıynsha Astana qalasynyń kórikti jerlerin, úılesim tapqan arhıtektýralyq ansamblderin, óner, bilim jáne mádenıet oshaqtaryn, elorda turǵyndarynyń otbasylyq demalys oryndaryn, qalalyq saıabaq, gúlzar, sýburqaqtaryn nemese ózge de kórinisi ǵajap tabıǵat aıasyn beıneleýge múmkindik beriledi. Halyqaralyq deńgeıde ótkizilgeli otyrǵan kórmege Otandyq qylqalam sheberlerimen qatar kórkemsýret ónerine jaqyn oqý oryndarynyń tálimgerleri de at salysyp, is-sharanyń uıymdastyrylýyna óz úlesterin qospaq.
Kórkemsýret kórmesi – mádenı shara, ol sheteldik, ulttyq beıneleý óneriniń týyndylaryn kópshilik nazaryna usynyp, óner salasynyń damý deńgeıi, baǵyt-baǵdary jaıly mamandardyń, ónertanýshylar men sheberlerdiń pikirlesýine múmkindik beredi.
Kórme maqsaty – elorda qonaqtaryn onyń 20 jyldyq tarıxymen, tarıxı-mádenı keremetterimen, qonaqjaı xalqymen tanystyrý. Kórme Astana qalasy, QR Ulttyq mýzeıinde uıymdastyrylady jáne kórkemsýret týyndylary is-shara sońynda Ulttyq mýzeı qoryna tabystalady. Endeshe, elorda turǵyndary men qonaqtaryn, kórkemsýret sheberligin erekshe baǵalaıtyn ónersúıer qaýymdy bas qalanyń ǵajap beınelerin tamashalaýǵa shaqyramyz!