Belgili teatr rejısseri, kınorejısser, senarıst Talǵat Temenovtiń esimi kópke málim. Onyń «Adamdar arasyndaǵy bóltirik» (1988), «Qyzǵysh qus» (1991), «Mahabbat beketi» (1993) t.b. fılmderi kórermenderdiń kózaıymyna aınalyp, halyqaralyq kınofestıvalderdiń laýreaty atandy. Búginde rejısserdiń jańa «Qara qyz» atty týyndysy kórermenge jol tartpaq.

«Qara qyz»  dramalyq janrdaǵy týyndy retinde tek ótkenniń kórinisin ǵana emes, sonymen qatar qoǵamǵa ózegi tereń tarıhı jaralardy da beıneleıdi. Bul fılm ótkenimizdiń aınasy tárizdi, kórermenge tarıhymyzdy kózben kórýge, ony sezinýge múmkindik beretin ónerdiń erekshe bir formasy. Alaıda aınany durys qoldaný qajet: eger aına taza bolsa, onda aına aldyndaǵy beıne de shynaıy ári áserli bolady. «Qara qyz» fılminiń avtorlary osy qaǵıdany ustana otyryp, qazaq tarıhynyń aýyr betterin shynaıy kórsetýge barynsha tyrysqan.

Fılmde Ekinshi dúnıejúzilik soǵys beınesi men keńestik saıasattyń qazaq halqyna jasaǵan qııanattary kórinis tabady. Bul týyndyda eki túrli soǵystyń aýyrtpalyǵy kórsetiledi: maıdandaǵy erlerdiń azaby men tyldaǵy áıelder men balalardyń qaıǵy-qasireti. Rejısser bir jaǵynan soǵys alańyndaǵy jaýyngerlerdiń kúresin sýrettese, ekinshi jaǵynan tyldaǵy qarapaıym halyqtyń kúndelikti arpalysyn beıneleıdi. Fılm kórermenge osy eki kúresti – syrtqy jáne ishki maıdandy – qatar kórsetip, qazaq halqynyń tarıhı qasiretine nazar aýdarady.

Fılmniń vızýaldyq sheshimderinde qyzyl tústiń qoldanylýy erekshe mánge ıe. Bul tús – qazaq halqynyń soǵystan shekken azabyn beıneleıtin sımvolǵa aınalady. Qyzyl tústi elementter fılmniń kórkemdik qurylymyn tolyqtyryp qana qoımaı, kórermendi tarıhtyń qandy izderimen betpe-bet kezdestiredi. Sonymen birge, rejısser tarıhı shyndyqty kúsheıtý úshin soǵys jyldarynda túsirilgen naqty hronıkalyq kadrlardy da paıdalanady. Bul ádis fılmniń taqyrybyn aıqyndaı túsip, kórermendi sol zamandy kózimen kórgendeı kúıge bóleıdi.

Fılmniń ataýy – «Qara qyz». Bul ataý tek basty keıipker Almagúldiń laqap esimi ǵana emes, sondaı-aq qazaq halqynyń qaraly kúnderin bildiretin metaforaǵa aınalady. Almagúl beınesi arqyly fılm soǵys pen zulmat jyldardyń halyqqa tıgizgen aýyrtpalyǵyn, qazaqtyń qasiretti tarıhyn meńzeıdi. «Qara qyz» – tek ótkenniń ǵana sımvoly emes, búgingi qazaqtyń jadynda saqtalǵan sol jyldardyń aýyr kórinisi.

Tarıhı fılmder jasaý – úlken jaýapkershilikti talap etetin, kúrdeli óner. Bul janrdaǵy týyndylar tek tarıhı oqıǵalardy beıneleýmen shektelmeı, kórermenniń tarıhı sana-sezimin oıatyp, oǵan tereń oı tastaıdy. «Qara qyz» fılmi osy maqsatqa jete bilgen.