Óner – ómir mektebi. Osy bir qasıetti ólkede eleýli eńbek etip júrgen shyǵarmashylyq ıeleri týrasynda túgesilmeı syr shertýge bolady. Qazaq rýhanııatyn baıytýǵa úles qosyp júrgen sahnagerlerdiń jalǵasy jas býyn artıster bolýy zańdy. Oıshyl Ábýnasyr ál-Farabıdiń «Elińniń bolashaǵyn bilgiń kelse, maǵan jastaryńdy kórset, sonsoń aıtyp bereıin» degen paıymyn negizge alsaq, jas býynnyń tanym-túsinigi, azamattyq kózqarasy qaı kezeńde de mańyzdy. Búgin óner ólkesindegi jastardyń biri, Almaty Memlekettik qýyrshaq teatrynyń jas býyn artısi, eńbekqor, talapshyl, talantty Alııar Nurádilmen suhbattasyp, kózqaras-paıymyn bilýge tyrystyq.
Alııar myrza, qaıyrly kún! Qýyrshaq óneri qyzyq ta kúrdeli qubylys. Búgingi teatr úderisinde naǵyz ámbebap, jańashyl ujym ekenderińizdi dáleldep kelesizder. Ár adamnyń baǵyna buıyra bermeıtin óner jolyna qadam basqanyńyz úshin kimderge boryshtarmyn dep oılaısyz?
Qaıyrly kún! Árıne, birinshiden bizdi jaratqan, boıymyzǵa ónerge degen talpynys darytqan Allaǵa, talpynysymyzdy baıqap, qoldaý kórsetken ata-anama jáne kásibı turǵyda bilimimdi jetildirýde jol ashqan J.Elebekov atyndaǵy estrada jáne ırk kolledjindegi ustazym Maısa Omarbekqyzyna boryshtarmyn. Ustazymyz bizdi artıst retinde ǵana emes, adamı qundylyqtardy sińirgen maman bolýǵa baýlydy.
Artıst retinde qalyptasýyńyzǵa olardyń qandaı septigi tıdi?
Maqsatymyzdy aıqyndaýǵa, bala armandardyń shyndyqqa aınalýyna, baǵyt-baǵdarymyzdy nyqtaýǵa árbiriniń tıgizgen áseri zor. Kez-kelgen shyǵarmashylyq ıesi úshin jol silteýshiniń mańyzy zor dep oılaımyn.
Búginde balalarmen qatar, eresekterge de spektaklder sahnalap kelesizder. Bul proess sizderge qanshalyqty qıyn nemese jeńil? Spektaklde rol somdaý barysynda eń birinshi nege mán beresiz?
Iá, biz bir kúnde balalarǵa arnalǵan birneshe spektaklder oınap, keshke eresek kórermender úshin qoıylymda oınaıtyn kezderimiz bolady. Sonymen qosa jańa spektaklderge de daıyndyqtar júrip jatady. Osyndaı shyǵarmashylyq qarbalastan kerisinshe lázzat alamyz. Rol oınaǵanda obrazdy ashýǵa mán beremin. Balalar qoıylymdarynda qosalqy keıipkerler bolmaıdy. Ár keıipker, jan-janýar, qus, adam bolsa da balalardyń esinde qalatyndaı obraz bolýy tıis. Qýyrshaq teatry artısteri eki ese jaýapkershilik sezinetini sondyqtan. Qýyrshaqtarmen birge ózimizdi de jan-jaqty kórsete bilýimiz qajet.
Teatr ónerinde «geroınıa» degen termın bar. Sizdiń túsinigińizde geroınıa qandaı bolýy qajet? Qazirgi qazaq teatrlary mysalynda kimderdi aıtar edińiz?
Iá, negizi bul sahna ónerinde jıi aıtylatyn, taldanatyn túsinik. Biraq, men osyndaı túsinikpen syılasýǵa qarsymyn. Degenmen, adamgershilik pen ónerdiń ortaq tusyn taýyp, san túrli beınelerdi somdap júrgen talantty artıst-ápkelerimiz, zamandastarymyz bar. Men eńbekqor, jan-jaqty dep Ajarlym Maǵzum, Gúlbahram Baıbosynova, Araılym Baıyrbekova syndy aktrısalardy aıtar edim.
Eń alǵashqy qoıylymda oınaǵan sátińizde biraz júreksingen bolarsyz? Álde jastyq jigermen qobaljýdan qýanysh basym tústi me?
Eń alǵash balalarǵa arnalǵan «Arystannyń úreıin qalaı emdeımiz?» qoıylymynda óner kórsetken bolatynbyz. Jastyqtyń býy ma, buryndary kórermen retinde kelip júrgen teatrdyń sahnasyna shyqqanyma degen qýanysh sezimi basym boldy. Kishkentaı kórermenderimizdi qýanta alatynymyz, barlyq baǵytta tájirıbe jasaı alatyn qýyrshaq óneriniń sheksiz múmkindigin kóre alatynyma degen sezimdermen qobaljýdy da umytyp ketken sekildimin.
Sizben zamandas-qanattas áriptesterińiz, jalpy jastar sahnaǵa qandaı jańa saryn ákelýdesizder?
Jalpy óner salasyn qazir arzan dúnıelermen shatastyryp júrmiz. Teatr óneri bul kásibı bilim, ishki ıntelektti talap etetin móldir óner. Talaptanyp júrgen talantty, izdenis ústindegi qanshama dostarymdy, áriptesterimdi bilemin. Qazir bizge múmkindik kóp. Bári qoljetimdi. Solardy jan-jaqty paıdalanamyz dep oılaımyn. Jas býynnyń jetistikteri ýaqyt óte teatr mamandary men kórermenderdiń baǵasymen anyqtalady.
Sońǵy ýaqytta ózińiz kórgen, qatty unaǵan, tebirentken qoıylymdardyń beseýin ata dese, qandaı qoıylymdardy atap shyǵa alasyz?
V.Polýnın «Snejnoe shoý», Jas sahna teatry «Moı malenkıı Oskar», Nur-Sultan Jastar teatry «Jer men kóktiń arasy» jáne Fılıpp Jantıdiń barlyq spektaklderin úzdik dep esepteımin.
Sizge qaı baǵyt, janrdaǵy qoıylymdarda oınaǵan unaıdy?
Komedııa janryndaǵy spektaklder unaıdy. Artıst tabıǵatynyń ashylýyna, kásibı ósýge degen úlken múmkindikter osy janrda bolady dep oılaımyn.
Al, búgingi Qýyrshaq teatrynda qandaı janr kemshin dep esepteısiz?
Artıst rol, janr tańdamaıdy ǵoı. Biraq, aıtqanymdaı bizde komedııalyq elementteri basym spektaklder az. Bolashaqta sahnalanady dep oılaımyn.
Ýaqyt bólip, suhbattasqanyńyzǵa raqmet! Shyǵarmashylyq tabystar tileımiz!