Anar Erkebaı
Amerıka Qurama shtattarynyń óneri degende birden oıymyzǵa keletini Gollıvýdtyń kınosy, Brodveıdiń mıýzıklderi men zamanaýı estradasy. Elimizdiń óner ındýstrııasyn amerıkandyq úlgimen júrgizýge, nemese sol jaqtyń prodıýsserleri men kórermenderiniń kózderine ilinýine biz bar kúshimizdi salatynymyz da aıan. Degenmen de, amerıkandyq kıno-mıýzıkl men estradasyna jetý úshin áli talaı eńbek etý kerektigi de jasyryn emes. Otandastarymyzdyń sol jaqqa baryp oqyp, úırenip júrgenin árdaıym qýanyshpen qarsy alamyz. Qazirgi tańda Reseıdiń tanymal rejısseri Tımýr Bekmambetovtyń Gollıvýdtyń shyńyn baǵyndyrǵanyna biz qýana qarap, onyń shyǵarmashylyqyn qadaǵalap otyramyz. Osyndaı azamattarymyz kóp bolsa eken dep tileıtinimiz de shyndyq.
Qazirgi jastar til úırenip, sheberlikterin shyńdap, sheteldiń óner maıdanynda óz ornyn tabýǵa qulshynys qadamdar jasap jatyr. Sondaı jas qyzdarymyzdyń biri – Horlan Joljaqsynova. Árıne, ol birden Gollıvýdty baǵyndyrdy dep aıtýdan aýlaqpyz. Biraq, sol kıno ındýstrııaǵa bas suǵyp, álemge tanymal bolǵan juldyzdarmen tyǵyz qarym-qatynastar ornalastyryp, aldyna qoıǵan maqsatqa asyqpaı aqyryn basyp kele jatyr dep naqty aıta alamyz. Bunda úlken rol bolmasa da, kópshilik sahnalary men epızodtyq beınelerdiń ózine iligý qıynnan qıyn ekeni málim. Tipti ánshilerdiń klıpterine túsýdiń ózi «Bastılııany alǵanmen» para-par. Sondyqtan da, Horlannyń ataqty hıp-hop ánshisi Krıs Braýnnyń kózine túsip, ol óziniń «Tone it down» ánine túsirilgen klıpine qatystyrtýdyń ózi úlken jetistik dep aıta alamyz.
Amerıkandyq ánshi ári akter Krıs Braýn álemniń R’n’B oryndaýshylarynyń ishindegi tanymaldysy. Amerıkanyń áıgili Billboard Hot 100 hıt-paradynyń aldyńǵy qataryna shyqqan alǵashqy afroamerıkandyq ánshini búgingi tańda bilmeıtin jas kemde-kem. Onyń Djordın Sparks, Rıanna, Djoıner Lýkas, Rıta Ora, taǵy basqa da tanymal ánshilermen qosylyp aıtqan dýetteri kópshiliktiń kóńilinen shyqqan dúnıeler boldy. Sonymen qatar, Krıs Braýnnyń bıshilik te qabiletin moıyndaǵandar ony árdaıym Asher jáne Maıkl Djeksonmen salystyrmaly túrde qarap otyrady.
Mine, osyndaı tanymal ánshiniń klıpine túsken Horlan Joljaqsynova úshin tek qýanymyz zańdylyq ta. Árıne, ol jerde basty keıipkerdi somdamasa da, ekrannan jaı ǵana óte shyqqannyń ózinde basqa álem, ózge dúnıeniń ishinde qazaq qyzynyń júzin kórgenimiz úshin bir súısinip qaldyq.
Horlan Joljaqsynova elimizdiń tanymal akterlik otbasynan shyqqan. Ákesi Erik Joljaqsynov elimizdiń kınoındýstrııasyn kóterýge talaı kúsh jumsap júrgen akterlerimizdiń biri. Al, anasy – Qymbat Tileýova uzaq jyldar boıy M.Áýezov atyndaǵy Qazaqtyń memlekettik akademııalyq drama teatrynyń aktrısasy bolyp, talaı jetekshi rolderdi oınady. Sondyqtan Horlannyń áke-sheshesiniń jolyn qýyp akterlik kásipti tańdapty. Ony otandyq kórermen «Aısha», «Jaryq» telehıkaıalarynan jaqsy tanıdy. Bunda ol basty rolderdi oınap, óziniń akterlik múmkindikteriniń moldyǵyn kórsetip kórermenniń kóńilen shyqty.
Nıý-Iorktyń kıno akademııasynyń kıno akteri mamandyǵy boıynsha magıstratýrany bitirgen Horlan endi Gollıvýdtyń tamyryn basyp kórmekshi. 2017 jyly Los Andjeleste ótken Qazaqstannyń mádenıet jáne kıno kúnderinde de Horlannyń uıymdastyrýshylarǵa úlken eńbegin tıgizgenin de estip jatyrmyz. Muhıttyń ar jaǵyndaǵy shoý-bızneske tyrnaqtaı bolsa da úles qosyp júrgen qarakóz qyzymyzdan úlken úmit kútemiz!
