27 aqpan kúni T. Júrgenov atyndaǵy Qazaq Ulttyq Óner akademııasynda «Ónertaný» fakýlteti, «Kıno tarıhy jáne teorııasy» kafedrasy, «KınoMan» kınoklýbynyń uıymdastyrýymen basty rolderdiń birin Ámına Ómirzaqova somdaǵan «Taqııaly perishte» fılminiń kórsetilimi ótti. Kórsetilimge kelgen kórermender fılmdi buryn-sońdy kórse de, birinshi márte kórgendeı kúıde bolǵandaryn árbir sátinde ezý tartyp, fılm bitkenge deıin qyzyǵýshylyqpen, tapjylmaı tamashalaǵandarynan ańǵarýǵa bolady. Arada kóp jyl ótse de, áli kórermen kózaıymy bolyp kele jatqan jáne aldaǵy ýaqytta da shoǵy sónbeıtin bul fılm 1968 jyly jaryqqa shyqty. Rejısseri de, senarıı avtory da birtýar, qaıtalanbas, shoqtyǵy bıik tulǵa - Sháken Aımanov.
Fılmde kenje balasynyń boıdaqtyǵyna tynysh tappaǵan Tana apa balasyna laıyqty jar, ózine kelin bolar qyz izdeıdi. Kóńili túskenderin ulyna tanystyrǵysy kelip, álek bolady. Biraq, kóńili basqany qalaıtyn Taılaq ár qyzǵa ár túrli qylyq kórsetip, tanystyqtary uzaqqa sozylmaı qalyp jatady. Taılaqtyń unatqany Tana apanyń burynǵy ǵashyǵy, Tana apaǵa sóz salyp, artynsha ýádesinde turmaı ketken Taıyrdyń qyzy edi. Sol sebepti, balasynyń tańdaýyna qarsy shyǵyp, basqa qyzdardy izdeýdi toqtatpaıdy. Júregi balasynyń baqytyn kórýdi ańsaıtyn ana kóp ulyna qalyńdyqty kóp ýaqyt izdeıdi. Biraq, júrek shirkin eshteńege kónbeıdi ǵoı, Taılaq aqyry óz súıgen qyzyna úılenedi. Balasynyń bir basy ekeý bolǵanyn qalaǵan ananyń armany oryndalady.
Aıta keteıik, fılmniń premerasy 1969 jyly, tamyz aıynda bolǵan. Dál sol 1969 jyly «Ortalyq Azııa jáne Qazaqstan kınematografısteriniń dıplomdyq baıqaýyna» qatysqan eken.
foto gýgl ashyq aqparat kózinen alyndy