"Golos. Detı" mýzykalyq baıqaýynyń altynshy kezeńiniń jeńimpazy retinde tanymal qazaqstandyq jas talant Erjan Maksım kúni keshe Polshada ótken "The Junior Eurovision" án baıqaýynda óner kórsetip júldeli ekinshi orynǵa ıe boldy.
Erjan Polshanyń Glıvıa qalasynda ótken "The Junior Eurovision" án baıqaýynda Qazaqstan atynan 10-nómirmen shyǵyp, "Armanyńnan qalma" ("Don't forsake your dream") ánin Polsha kóginde áýeletti.
Daýys berý nátıjesi boıynsha, otandasymyz 227 upaı jınap, ekinshi oryndy ıelense, birinshi oryndy 278 upaı polshalyq qatysýshy Vıktorııa Gabor jeńip aldy. Al úshinshi oryn Ispanııanyń namysyn qorǵaǵan Melanı Garsııaǵa buıyrǵan.
Aıta keteıik, Qazaqstan alǵash ret atalmysh án alańyna 2018 jyly boı kórsetken. Ol kezde 12 jastaǵy Danelııa Týleshova "Ózińe sen" ánin oryndap, altynshy oryn ıelengen edi.
Tórt jasynan bastap án salatyn Erjan Maksım 2007 jyly Oral qalasynda dúnıege kelgen. Búginde Máskeýde bilimin jetildirip jatqan ánshiniń alar asýy áli alda degen senimdemiz.