QR Mádenıet jáne sport mınıstrliginiń tapsyrysymen «Qazaqfılm» kınostýdııasynyń «Debıýt» shyǵarmashylyq birlestigi túsirgen «Dombyra» qysqametrli fılmi Ispanııada ótken Short Of The Year qysqametrli fılmder baıqaýynyń qysqy maýsymynda qazylar alqasynyń arnaıy júldesimen marapattaldy. Kartınanyń rejısseri – Ramazan Qalıolla.
Kartınanyń jelisi dombyranyń qulaǵynda oınap, úlken sahnada óner kórsetýdi armandaǵan Áset esimdi balanyń ómirin baıandaıdy.
Short Of The Year festıvali jyldyń ár maýsymynda shyǵatyn 4 shyǵarylymnan turady (qys, kóktem, jaz jáne kúz). Ár maýsymda uzaqtyǵy 30 mınýttan aspaıtyn 50-ge jýyq kórkem, anımaııalyq, derekti, eksperımenttik jáne mýzykalyq fılmder báıgege túsedi.
Festıvaldiń «Eń úzdik kórkem /derekti/anımaııalyq /eksperımenttik /mýzykalyq qysqametrli fılm» sııaqty resmı nomınaııalarynan bólek qatysýshylar «Qazylar alqasynyń arnaıy syılyǵy» úshin synǵa túsedi. Osy júldege ıe bolǵan kınotýyndylar dúnıe júzinde ótetin festıvalderge tegin joldama alady.
Aıta ketsek, atalǵan kınotýyndy byltyr Almatyda ótken IV Halyqaralyq Baiqonyr ISFF kınofestıvaliniń konkýrstan tys baǵdarlamasynda kórsetilip, «Brodveı tańdaýy» syılyǵyn alǵan. Sondaı-aq bul fılm Nıý-Delı qalasynda ótken VIII Halyqaralyq qysqametrli fılmder festıvalinde (Delhi Shorts International Film Festival) «Úzdik fılm» júldesin jeńip aldy. Sonymen qatar, fılm Sensus HKF jáne XIX Kids First baıqaýyna qatysqan bolatyn.
