2020 jyldyń 12-16 aqpan aralyǵynda «Arman» kınoteatry men Qazaqstannyń kınosynshylary qaýymdastyǵy halyqaralyq kınofestıvalderdiń júldeli fılmderiniń kórsetilimin ótkizedi. Kórsetiletin fılmder tiziminde QR Mádenıet jáne sport mınıstrliginiń tapsyrysymen Sh.Aımanov atyndaǵy «Qazaqfılm» kınostýdııasy túsirgen tórt kartına bar.
Aqpannyń 13 kúni kórermender rejısser Jańabek Jetirýovtyń Ábish Kekilbaev povesiniń jelisimen túsirgen «Shyńyraý» fılmin kóredi. Kartına qudyq qazýshy Eńseptiń oqıǵasyn baıandaı otyryp, menmendik, baqtalastyq, mahabbat, dostyq, qastandyq syndy adamǵa tán qubylystardy kóteredi.
Bul týyndy Bangladesh XVII Halyqaralyq Kınofestıvaliniń azııalyq fılmder baıqaýyna qatysyp, «Úzdik operatorlyq jumys» (operatory Rıvkat Ibragımov) júldesin jeńip aldy. Odan bólek, «Shyńyraý» fılmi Qytaıdyń Sıamin (Xiamen) qalasynda ótken XXVIII «Altyn átesh jáne Júz gúl» atty Búkilqytaılyq festıvalge, AQSh-ta ótken Asian International Film Festival Arizona-ǵa, Úndistannyń Kerala Halyqaralyq Kınofestıvaline jáne Jaıpýr qalasynda ótken II Kaaryat Kınofestıvaline qatysqan.
14 aqpanda kórermenderge Ázız Zaıyrov pen Muhamed Mamyrbekovtiń «Qyz ben teńiz» áleýmettik dramasy usynylady. Kartınada BP-men aýyratyn Ásel esimdi boıjetkenniń qıyn taǵdyry, onyń armandary, mahabbaty jáne otbasy týraly baıandalady.
Bul kınotýyndy byltyr Londonda ótken Romford Film Festival-da «Úzdik áıel adamnyń róli» (Dınara Sharıpova) júldesimen, Bashqurtstanda ótken IV «Kúmis Aqbozat» Halyqaralyq Kınofestıvalinde «Áleýmettik jáne motıvaııalyq kıno» nomınaııasy boıynsha qoǵam qaıratkeri Karıne Habırovanyń arnaıy júldesimen jáne Bashqurtstan Respýblıkasy otbasy jáne eńbek mınıstrligi atynan «Armandardyń oryndalýy» arnaıy syılyǵymen (akter Tahır Ýmarov) jáne Barselonada ótken Asian Film Festival Barcelona-da «Úzdik fılm» júldesimen marapattalǵan bolatyn.
15 aqpanda almatylyqtar 41-Máskeý Halyqaralyq Kınofestıvalinde qazaqstandyq kıno tarıhynda tuńǵysh ret bas júldeni jeńip alǵan Farhat Sharıpovtyń «Tulǵalyq ósý trenıngi» fılmin kóre alady. Sondaı-aq, kartına XV «Eýrazııa» Halyqaralyq Kınofestıvaliniń Gran-prı ıegeri.
Fılminiń álemdik tusaýkeseri byltyr 23-shi Halyqaralyq Býsan kınofestıvaliniń konkýrstyq baǵdarlamasynda ótken. Sonymen qatar, sol jyly kartına XIV Halyqaralyq Sháken Aımanov Kınofestıvalinde Qazylar alqasynyń jáne NETPAC júldelerine ıe boldy.
«Tulǵalyq ósý trenıngi» fılmi qyryq jasqa kelgen, orta jas kúızelisin keship júrgen, ómirden eshteńe kútpeıtin bank qyzmetkeri - Qanat týraly baıandaıdy. Bir kúni bas keıipker koých-trenerdiń ómirde tabysqa jetý jáne kóshbasshy bolý jaıly tulǵalyq ósý trenıngine qatysady. Kóshbasshylyqtyń qyr-syryn túsinip, birazdan beri kórmegen tanysy Danııardy kezdestirgende, onyń ómirge degen kózqarasy ózgeredi.
16 aqpanda Emır Baıǵazın trılogııasynyń sońǵy bólimi - «Ózen» kartınasy kórsetiledi. Oqıǵa jelisi órkenıetten alys jerde turatyn, qaladan kelgen qonaqtan keıin ómirleri kúrt ózgere bastaǵan bes aǵaıyndy týraly baıandaıdy.
Esterińizge sala ketsek, «Ózen» fılminiń álemdik tusaýkeseri Veneııa kınofestıvali sheńberinde ótken bolatyn. Bul festıvaldiń «Kókjıekter» baǵdarlamasynda Emır Baıǵazın «Úzdik rejısser» atandy. Sondaı-aq, kıno taqyrybynda jazatyn álemniń beldi buqaralyq aqparat quraldary atalǵan kınotýyndy jaıynda jaqsy pikirde jarysa jazdy. Al fılmniń Soltústik Amerıkadaǵy tusaýkeseri byltyr qyrkúıek aıynda Halyqaralyq Toronto kınofestıvali aıasynda ótti. Kınotýyndy festıvaldiń «Tuǵyrnama» konkýrstyq baǵdarlamasynda kórsetilip, qazylar alqasynyń qurmetti atalymyna jáne Screen Daily táýelsiz kınosynshylardyń reıtıng tiziminde aldynǵy qatardan kórindi. Jyl saıyn ótetin XII Asia Pacific Screen Awards saltanatynda «Ózen» fılmi «Rejıssýradaǵy tabysy úshin» syılyǵyna úmitker boldy. Fılmniń azııalyq tusaýkeseri Tokıo kınofestıvaliniń konkýrstyq baǵdarlamasy aıasyndy ótti. Al Los-Anjelestegi Asian World Film Festival-da «Ózen» fılmi qazylar alqasynyń júldesine – «Naǵyz kıno tilimen beınelengen kóńilińdi birden baýrap alatyn fılm» júldesine ıe boldy. Odan bólek, Emır Baıǵazın Holıýdtyń shetel baspasózi qaýymdastyǵynyń grantyna («Altyn Globýs») ıe boldy.
Máskeý qalasynda «Máskeýlik tusaýkeser» atty dostastyq elderi arasyndaǵy halyqaralyq kınofestıvaldiń negizgi baıqaýyna qatysqan Emır Baıǵazınniń «Ózen» fılmi baıqaýdyń Bas júldesine qol jetkizdi. Odan bólek, osy festıvalde jumys istegen kınoklýbtardyń halyqaralyq qazylar alqasy otandyq fılmge «Úzdik tolyqmetrli fılm» («Maǵynasynyń tereńdigi, aýyspalylyǵy jáne poetıkasy úshin») júldesimen marapattady.
