Otandyq jazýshy Danııar Súgiralınovtyń «Kirpishter 2.0» atty kitabynyń jelisi boıynsha túsirilgeli jatqan «Kirpishter» fılminiń túsirý jumystary bastaldy.
Fılm – óz ómirin ózgertýge bet burǵan jigit jaıynda. Maqsatyna jetý jolynda meıirimdiden qatygezge aınalǵan ol – ıgi qasıetterimen qosa, arqa súıer dostarynan da aırylady. Ómiriniń basqa arnaǵa burylyp, jurtshylyqtyń adaldyǵyna senýden qalyp, óziniń adam tanymastaı ózgergenin baıqaǵan ol – kúızeliske ushyrap, ishimdikke salynady. Alaıda, maskúnemge járdem beretin janashyrlar tabylyp, alǵa qaraı nyq senimmen qaıta qadam basady.
«Ómirden óz ornyn taba almaǵan, ábden túńilgen jastarǵa arnalǵan bul shyǵarma qanattaryn keńge jaıyp, ómirlerin maǵynaly etip ózgertýge shaqyrady», - dedi «Kirpishter 2.0» kitabynyń avtory Danııar Súgiralınov.
Fılmniń túsirý toby:
Rejısseri ári senarıı avtory - Farhat Sháripov
Operatory - Aleksandr Plotnıkov
Sýretshi - Alekseı Shındın.
Sonymen qatar, «On alty qyz» (rej. Q.Mustafın) fılminiń jalǵasy «Eń sulý. 14 qyz» fılmi bıyl jaryqqa shyqpaqshy. Kınokomedııanyń avtory bul fılmniń dostyqty nasıhattaýshy, ázil men qyzyqty oqıǵalarǵa toly, halyqtyń kóńlinen shyǵatyn týyndy bolatynyn aıtty.
Fılm jelisi Samat esimdi surboıdaq jigit týraly. Onyń Baýyrjan men Tımýr esimdi dostary oǵan qalyńdyq taýyp, úılendirmekshi bolady. Bul jolda olar qıyndyqtar men qyzyqty oqıǵalarǵa tap bolady. Alaıda, bári oıdaǵydaı aıaqtalyp, Samat óz qalyńdyǵyn tabady.
«Qaı kezeńde de qazaq halqy shańyraqty joǵary baǵalaǵan. Qazirgi zamanda jastar januıa qurýǵa asyqpaıdy. Erkin qarym-qatynasqa jol berip, mánsapqa kóbirek qyzyǵatyn jalǵyzbastylar sany kóbeıip jatyr», - dedi kınokartınanyń rejısseri Qanaǵat Mustafın.
Fılmniń túsirý toby:
Senarıı avtory – Qanaǵat Mustafın, Serik Qasabekov
Qoıýshy rejısseri - Qanaǵat Mustafın
Qoıýshy operatory - Aıdar Ospanov
Prodıýseri – Aıdarhan Ádilbaev
Atqarýshy prodıýser – Sholpan Bóribaeva
Dırektory – Ádil Qojabergenov
Al, «Shala qazaq» fılminiń senarıı avtory ári rejısseri Tólegen Baıtúkenovtyń basty keıipkeri - Jan esimdi jigit. Fılm – ana tilin bilmeıtin, tanymal gazette tilshi bolyp jumys jasaıtyn jigit jaıynda. Oqıǵa jelisi Jannyń aýrýhanada es jıyp, kenetten, aǵylshyn, orys tilderin umytyp, qazaq tilinde sóılep ketýimen órbıdi. Buryndary týǵan tili men dástúrlerinen beıhabar bolyp, kúlkige aınalǵan Jan endi jańa ómirge qadam basady.
Atalmysh fılmderdiń túsirilimderine sáttilik tileı otyryp, kórermenderdiń ystyq yqylasyna bólenetin týyndylar bolsyn degen izgi tilegimizdi bildiremiz.
Aıjan ESENGELDI
Derek www.kazakhfilmstudios.kz saıtynan alyndy.