48 saǵat ishinde berilgen tapsyrmaǵa laıyq ıdeıa taýyp, senarıin jazyp jáne sol senarıdi daıyn fılmge aınaldyrǵan rejısserlerdiń jumystary festıval ishindegi festıval áserin berdi. Ár fılm ártúrli janrda, óz formalarymen, taqyryptyq jáne kórkemdik qoltańbasymen erekshelendi. Festıvaldiń qatysýshylarǵa bergen taqyryby – bolashaq. Shynynda, bolashaq qandaı bolýy múmkin? Bolashaqtyń osy sátten qanshalyqty ózgeshe bolýy múmkin ekendigin 48 saǵat ishinde oılastyryp, formaǵa salyp, ıdeıasy tolyq fılmdi túsirgen rejısserler – jumystary arqyly bolashaqtyń dál qazir jáne osy jerde ekendigin kórsetkisi kelgen. Kórsetken de. Birneshe fılmnen jeke mysaldar kórsete keteıik.
Aldııar Baıraqymovtyń "Suıyq tas" fılmi – adam balasynyń toıymsyzdyǵynyń tabıǵatqa tıgizgen áserin qarııanyń bir jaqty dıalogy arqyly jetkizedi. Úıin alýǵa kelgen memlekettik qyzmetkerge keıipkerdiń jasaǵan is-áreketi arqyly rejısser adam balasy da tabıǵat bóligi bolǵandyqtan, óz isinen ózi buzylyp jatqanyn kórsetken. Betondy qoldanyp adam balasy qalaǵan ǵımaratyn qalaǵan jerde turǵyza alady. Alaıda, onyń aqyry ne bolaryna jaýap berýdi oılaı ma, joq pa degen suraq ashyq kúıinde qalmaq. Bul týraly oıdy rejısser kórermenge de qaldyrady. Óziniń jaýabyn da usynady. Tabıǵattyń bir bóligi bola tura, ony buzýǵa umtylǵan adam – bolashaqta bar bolýǵa laıyq pa?
"Shým" fılmi nemeresimen bire ómir súretin shaldyń is-áreketi arqyly urpaqtar arasyndaǵy baılanystyń ózge formaǵa enýin jetkizgen. Qazirgi qoǵamdaǵy adam úshin adamdar arsyndaǵy baılanystyń qıyndaýy túsinikti nemese qalypty jaı retinde bolýy múmkin. Alaıda, tehnıkalyq progresske deıin, adamdardyń arasyndaǵy berik baılanysta ómir súrgen adam úshin qarym-qatynastyń bul formasy aýyr tıedi. Ol adam ınternet arqyly sóılesý kezinde qarsy bettegi adamdy sezine almaǵandyqtan, tek telefonmen sóıleskendeı áserde qalady. Bul – bolashaqtyq baılanystyń jańa formasy. Adam arasyndaǵy baılanys osy formanyń áserinen múldem úzilýi múmkin degen oıdy rejısser Vanıa Abramov óz fılmi arqyly jetkizýge tyrysty.
Anýar Nurpeıisov óziniń 48 saǵatyn búgingi damyǵan tehnıkanyń adamǵa berer múmkindikterine arnap, "APPMAN" fılmin túsirgen. Qazaqsha emes, aǵylshynsha oqyp kórseńiz sizdiń de, bizdiń de sıpatymyz bolyp shyǵady [Arr (application) – qoldanba, man – adam]. Fılmniń keıipkeri qoldanbalardyń kómegimen ómir súrýge bolatynyn óz mysalynda kórsetip beredi. Kıim, tamaq, sport, bilim t.b. sizge kerektiniń barlyǵy alaqanyńyzdaǵy telefonnyń ishinen tabylady. Keıipker tamaq aldyrady, onlaın jattyqtyrýshymen daıyndalady, kóptegen kitaphanaǵa áreń sııatyn kitaptardy alaqanynda ustap, ishinen qalaǵan kitabyn oqıdy. Alaıda, keıipker kóńil kóterý úshin klýbqa baratyn kezde óz muqtajdyqtaryn tolyq baǵalaı almaǵandyǵyn túsinedi. Bul sátte qolyndaǵy bolashaǵy ózine zııanyn tıgize alatynyn da túsinedi. Ne bolsa da, ár nárseniń paıdaly jaǵy da, zııandy jaǵy da bolatynyn keıipker arqyly rejısser kórermenge baıandap berdi.
Osy fılmder de, ózge fılmder de saıystyń shartyna saı bolashaqtyń qandaı bolaryn sıpattaýǵa tyrysty. Árbir áreketimiz arqyly bolashaǵymyzdy jasap otyrǵanymyzdy, árekettiń jalǵasy aınalyp kelip ózińizge qaıta oralatynyn rejısserler taǵy da eske salyp ótti.
