QaraFest «Qupııa agent» fılmin usynady: Qartaıýdan qorqasyz ba?

Qartaıýdan qorqasyz ba? Qartaıǵanda qaıda barasyz? Endi qansha jyl ómir súrgińiz keledi? Bir sát osy suraqtar tóńireginde oılanyp kórdińiz be? Eger tipti oılanýǵa da qorqynyshty bolsa, «Qupııa agent» derekti fılmin kórińiz. Rejısseri – Maıte Alberdı.
QaraFest «Qupııa agent» fılmin usynady: Qartaıýdan qorqasyz ba?

Sebebi bul fılm arqyly keıbirimizge qorqynyshty bolǵan álemniń qyr-syry ashylady, ondaǵy keıipkerlerdiń jan dúnıesine úńilý arqyly ishki qorqynyshyńyz seıiledi. Bizdiń mentalıtet boıynsha ata-anasyn qarttar úıine ótkizip jibergen balalarǵa degen jekkórinish sezimi ǵana bar. Al, ol ǵımarattyń ishindegi taǵdyr tálkegine túsken tulǵalardyń ishki sezimine, ótkerip otyrǵan oqıǵalaryna eshkim úńilip kórgen emes.

Fılmde keıipkerler óte kóp. Keıipkerlerdiń kóptigi derekti fılmdegi shyndyqtyń salmaǵyn jan-jaqty qamtamassyz etip tur. Sonysymen qundy, sonysymen tereń. Sebebi árqaısysynyń óz jarasy, óz shyndyǵy, oryndalmaı qalǵan armany bar. Avtor barlyǵynyń sheshimin bas keıipker arqyly sheshkisi keledi. Meıirim jetpegenderge jyly sózben shýaq shashady, ishi pysqandarmen áńgime dúken qurady, mahabbattan qur alaqan qalǵandarǵa júrek túkpirinen oryn ashady.

Fılm sınopsısi boıynsha chılılik tyńshy 8Z jastaǵy Serhıony qarttar úıine shpıon bolýy úshin jumysqa alady, óıtkeni qarttar úıindegi anasyna ondaǵy qyzmetkerler zorlyq-zombylyq kórsetedi degen kúmáni bar. Taza, ádil ári ázil-shyny aralas, shytyrmanǵa toly bul fılm ómirdiń ǵajaıyptaryn taný eshýaqytta kesh emes ekenin túsindirgisi keledi.

Kartına «Oskar-2021» premııasynyń «Úzdik derekti fılm» kategorııasyna usynylǵan. Bul derektiń ózi fılm maǵynasy men túsirýshi toptyń kásibıliginen barynsha habar berip tur. Keıipkerlerdiń shynaıy shyǵýy, belgili bir dramatýrgııalyq jelige utymdy qurylýy, rejısserlik kózqarastaǵy ońtaıly sheshimder, operator jumysynyń kórinisi barlyǵy ushtasa kelip, fılmniń kórkemdiń qyryn arttyryp, kórermen júreginen oryn alýyna septigin tıgizetini anyq.

«Qupııa agent» fılmin kóremin deseńiz, QaraFest usynatyn kınokórsetilimderge kelińiz.

23-28 qyrkúıek aralyǵynda «Arman» kınoteatrynda QaraFest usynatyn 10 halyqaralyq fılm kórsetiledi. Al onlaın-festıval – qarafilmfest.kz alańynda 30 qyrkúıek pen 9 qazan aralyǵynda ótedi.

QaraFest baǵdarlamasynda Chılı, Túrkııa, Shveııa, Germanııa, Norvegııa, Fınlıandııa, Grýzııa, Belgııa, AQSh jáne Rýmynııadan 10 týyndy bar. Barlyq fılmder túpnusqa tilinde, qazaq jáne orys sýbtıtrlerimen kórsetiledi.

Kórsetilimder Soros-Qazaqstan qorynyń jáne Nıderlandtyq movies That Matter kınofestıvaliniń granttar baǵdarlamasynyń qoldaýymen uıymdastyryldy.