Jyl bastalysymen keı otandyq fılmderdiń tusaýy kesilip, kınoteatrlarda kórermen nazaryna usynylyp ta úlgerdi. Kóshti bastaǵan rejısser Rústem Ábdirashtyń «Qazaq eli» serıalynyń eki saǵatqa jınaqtalǵan «Almas qylysh» fılmi boldy. Kórermen qaýymdy XV ǵasyrdyń ortasyna jeteleıtin fılm Qazaq handyǵynyń qurylar tusyndaǵy halyqtyń hal-kúıinen syr shertedi. Tarıhı týyndydaǵy ásem kastıýmder men baı dekoraııa kezeń lebin sezdirgendeı. Al, Dosqan Joljaqsynov pen Erkebulan Daıyrov bolsa, keıipkerdiń kúrdeli bolmysyna enip, rólderin sheber oryndaı bildi.
Sonymen, bıyl jaryqqa shyǵatyn keıbir fılmderge toqtalyp óteıik...
«Ózen» («Reka») rej. Emır Baıǵazın
Bul – Baıǵazınniń jasóspirimder týraly kınotrılogııasynyń sońǵy bólimi. Fılmde bala kezinen kóp qıyndyqqa dýshar bolyp, erte eseıýge májbúr bolǵan Aslan jaıly baıandalady. Esterińizge sala ketsek, rejısserdiń alǵashqy eki týyndysy Halyqaralyq kınofestıvalderde júldeli oryndardy ıemdengen bolatyn.
«Ámire» rej. Djef Vespa
Sh.Aımanov atyndaǵy «Qazaqfılm» kınostýdııasy, prodıýser Álıdar Ótemuratov jáne gollıvýdtyq prodıýserler Kerı Grant pen Ed Djons birlesip, «Ámire» fılmin túsirýdi bastaǵan bolatyn. Fılmge alashtyń birtýar daryndy ánshisi Ámire Qashaýbaevtyń qysqa da jarqyn ómiri men jumbaqqa toly ólimi arqaý bolyp otyr. Qazaq halqynyń tól ónerin Eýropaǵa pash etip, dombyrasyn tanystyrǵan tulǵanyń rólin Sanjar Mádıev somdaıdy.
Qazaqstannyń AQSh-pen birlese otyryp túsirip jatqan jobasy – tabysqa toly bolady degen senimdemiz.
«Taqııaly perishte - 2» rej. Naızabek Sydyqov
Arada jarty ǵasyrǵa jýyq ýaqyt ótken áıgili týyndynyń jalǵasyn prodıýser Qusman Shalabaeva qyrǵyzstandyq rejısser N.Sydyqvpen birigip túsrimek. Atalmysh joba jekemenshik qarjylandyrýdyń kómegimen qolǵa alynǵan. Fılmniń zamanaýı nusqasynda Taılaq óziniń nemeresine jar izdeıtin bolady.
Túsirilim jumystaryna fılmniń birinshi bóliminde oınaǵan Álimǵazy Raıynbekov, Bıbigúl Tólegenova jáne Sholpan Altaıbaevalar at salysatyn bolady. Taılaqtyń ulynyń rólin Dáýlet Ábdiǵapparov, nemeresin Oljas Toǵymbet somdaıdy.
Qazaq kıno óneriniń altyn qoryna engen kınotýyndynyń jalǵasy kópshiliktiń kóńlinen oryn alady degen oıdamyz.
«Kelin de adam balasy» rej. Asqar Uzabaev
Fılm – aty aıtyp turǵandaı, ene men kelin arasyndaǵy qatynas jaıynda. Sıýjet boıynsha ekeýiniń oryndary almasyp ketip, kelinge eneniń, enege kelinniń jany qonady.
Joba prodıýseri ári rejısseri – Ásel Sádýaqasova. Akterlik quramda, odan bólek, Danagúl Temirsultanova, Danııar Alshynov, Ámına Malǵadjar jáne Ábýnasyr Serikov bar.
Túsirilim jumystary qazan aıynda bastalǵan fılmniń kórsetilimi 2017 jyldyń basyna josparlanyp otyr.
«Grıaz bolshogo goroda» (Qazaqsha aty naqtylanbaǵan) rej. Narıman Tórebaev
Narıman Tórebaevtyń «Partızandyq kıno» qozǵalysynyń aıasynda túsirgen «Grıaz bolshogo goroda» fılminiń senarııin rejısserdiń ózi Talǵat Shaǵambaevpen birlese otyryp jazǵan.
Fılm – jazalaý jaıynda. Trıller janrynda túsirilgen fılmdegi bas keıipker ádilettilik ornatqysy kelgen kek alýshy beınesin somdaıdy. Bul rólge jýrnalıst Asqar Meńdibaev bekitilgen. Akterlik quramda Dına Tasbolatova, Nurlan Jumaǵalı, Shyńǵys Qapın, Kamılla Nuǵmanovalar bar. Týyndy jyldyń sońyna deıin kórermen nazaryna usynylatyn bolady.
«Qashǵarǵa saıahat» rej. Jasulan Poshanov
Fılm – tarıhı tulǵa, ǵalym, shyǵystanýshy jáne saıahatshy Shoqan Ýálıhanovtyń ómiri jaıynda. Atap aıtqandaı, fılmde 22 jasar porýchıktiń Qytaıǵa sapary baıandalady.
Jobaǵa Poshanovtyń ózi prodıýserlik etse, Shoqan rólin Rústem Janamanov somdamaqshy. Odan ózge, akterlik quramda Berik Aıtjanov, Gúlnaz Jolanova, Áset Imanǵalıevtar bar.
«Súıemin seni, Aqerke!» («Ia lıýblıý tebıa, Aqerke!») rej. Meıirim Argymbaeva, Názııa Nazarbek
Astanadaǵy QazUÓÝ-niń birinshi kýrsynda oqyp júrgen Aqerke esimdi qyzdyń «qan obyryna» ushyraýy janyndaǵy dostaryn beı-jaı qaldyrmady. Daryndy jas qyzdyń ómirin qutqarý jolynda Germanııada jasalatyn otaǵa dostary aqsha jınaýǵa at salysady. Biraq, Aqerke 2013 jyly kóz jumady.
«Fılmniń negizgi taqyryby Aqerke bolǵanymen, mahabbat ta tys qalǵan joq. Aqerkege súıgeni Azamat kóp kómektesip, demeý bolǵan bolatyn. Kóziniń tirisinde aman-esen jazylyp ketse ol týraly fılm túsiremiz dep ýáde etken edik. Alaıda ýáde – ýáde, buıytsa 2 aqpan kúni elimizdiń barlyq kınoteatrlarynan tamashalaıtyn bolasyzdar», - dedi rejısser M.Arǵynbaeva.
Endeshe, otandyq kınematografıstterimizge sáttilik tileı otyryp, jaqsy týyndylar kútemiz!
Maqalaǵa aqparat tómendegi saıttardan alyndy:
Tolyǵyraq: http://massaget.kz/layfstayl/madeniet/kino/40756/
Tolyǵyraq: https://kaz.tengrinews.kz/cinema/askar-uzabaev-keln-de-adam-balasyi-komediyasyinyin-tusrlmn-275098/
Aıjan ESENGELDI