Bıylǵy jyly otandyq 50-den astam kınokartınanyń mereıtoıy atalyp ótedi. Alǵashqylardyń biri dep Efım Dzıgannyń 65 jyl tolǵaly otyrǵan «Jambyl» týyndysyn aıtýǵa bolady. Fılmde aqynnyń júz jasar shaǵyn somdaǵan Sháken Aımanovqa bul ról bıik dańq syılaǵan edi.
Kınematografııada ózindik orny bar týyndynyń áli kúnge deıin eskirmeýi – joǵary deńgeıdegi akterlik oıyn men bilikti shyǵarmashylyq toptyń eńbegi dep bilemiz.
Rejısser Efım Aronnyń «Botagóz» fılmine, kópshilik súısine qaraıtyn Sháken Aımanovtyń «Bizdiń súıikti dárigerine», sondaı-aq, Májıt Begalınniń «Onyń ýaqyty keledi» fılmderine bıylǵy jyly 50 jyl tolmaq.
Al, qazaq kınorejıssýrasynyń klassıgi Abdolla Qarsaqbaevtyń «Alty jasar Alpamys» fılmi, Eldor Orazbaevtyń «Transsibir ekspresi» fılmi 40 jyldyq mereıtoıyn toılamaqshy.
Sondaı-aq, rejısser Serik Aprymovtyń «Aqsýat» fılmine, Bolat Sháriptiń «Zamanaı» dramalyq fılmine, Rústem Ábdirashtyń «Quraq kórpesi» men Dárejan Ómirbaevtyń «Shuǵa» fılmine 10 jyl tolǵaly otyrǵanyn atap ketkenimiz jón.
Sonymen qatar, «Qazaqfılm» AQ túsirgen otandyq fılmderdiń birazyna bes jyl tolmaqshy. Olardyń qatarynda kópshilik kórermenniń yqylasyna bólenip, úzdik dep tanylǵan rejısser Aqan Satevtyń «Jaýjúrek Myń Bala», Ermek Tursynovtyń «Shal», Erlan Nurmuhambetovtyń «Ańshy bala» fılmderi bar.
20-ǵa jýyq anımaııalyq fılmderdiń mereıtoıy da atalyp ótilmek. Olardyń biregeıi 48 elde kórsetilip, 1975 jyly Nıý-Iorkte ótken kınofestıvalde qola júldeni jeńip alǵan rejısser Ámen Qaıdarovtyń «Qarlyǵashtyń quıryǵy nege aıyr?» mýltfılmine bıyl 50 jyl tolǵaly otyr.
Arada qansha jyl ótse de kórermenderdiń ystyq yqylasyn joǵaltpaǵan otandyq fılmderdiń mereıli toılary qutty bola bersin!
Aıjan ESENGELDI
Aqparat www.kazakhfilmstudios.kz saıtynan alyndy.