Sh.Aımanov atyndaǵy «Qazaqfılm» kınostýdııasynyń «Debıýt» shyǵarmashylyq óndiristik birlestiginde jeti qysqametrli kórkem fılmniń óndirisi aıaqtaldy. Olardyń qatarynda: «Jetim burysh» (rej. E.Boranshy), «Jestkıı tıp» (rej. B.Jumanov), «Mısha» (rej. A.Áýelbek), «Na granı» (rej.A.Baırakımov), «Pısmo» (rej. A.Musataev), «Taksıst» (rej. D.Mahmut) «El-Frıman» (rej.E.Raqymbekov) fılmderi bar. Fılmder QR Mádenıet jáne sport mınıstrliginiń tapsyrysy boıynsha túsirildi. Qazir túsirilim jumystary aıaqtalyp, montajdaý kezeńine ótti.
«Jyl saıyn osy sekildi týyndylardy túsirý – jas kıno mamandaryna beriletin keremet múmkindik bolyp otyr. Qazaq kınosynyń keleshegi jastardyń qolynda. Sondyqtan jas kınomatografısterge qoldaý kórsetip, olarǵa kıno ónerine jol ashý kerek», - deıdi Sh.Aımanov atyndaǵy «Qazaqfılm» AQ prezıdenti Baqyt Qaıyrbekov.
Taǵy bir aıta ketetin jaıt, qysqametrli fılm túsirý tájirıbesi «Qazaqfılm» kınostýdııasynda 1959 jyldan beri engizilgen. Keıinnen «Debıýt» shyǵarmashylyq óndiristik birlestigi bolyp ashylǵan. Sodan beri bul birlestik birshama rejısserlarǵa múmkindik berip, elge tanytty. «Debıýt» shyǵarmashylyq óndiristik birlestigine birneshe jyldan beri Anar Qashaǵanova jetekshilik etip keledi.
Jaqsy týyndy jasaý úshin senarııdiń de ózekti bolýy mańyzdy. Bul jaıynda otandyq rejısser, birlestiktiń kórkemdik jetekshisi Dárejan Ómirbaev: «Fılmdi óndiriske jibermes buryn kelip túsken senarıılerdi talqylaımyz. Ishinen jaqsylaryn iriktep alyp, senarıı avtorlarymen sóılesip, talqylap, osyǵan deıin túsirgen fılmderin kórip, olardyń dúnıetanymymen tanysamyz. Sodan keıin baryp óndiriske jiberý máselesin qarastyramyz», -dep pikir bildirdi.
Kıno salasynyń jas mamandary úshin bul – úlken múmkindik. Qazaq kıno óneri qaryshtap damı bersin!
Aıjan ESENGELDI
Derek www.kazakhfilmstudios.kz saıtynan alyndy