Ulystyń uly kúni naýryz meıramy qarsańynda taǵy bir otandyq fılm kórermenge jol tartpaq. Tańǵajaıyp bes oqıǵanyń tóńireginde órbıtin romantıkalyq komedııanyń basyn qosatyn – kez kelgen armandy oryndaıtyn sıqyrly bilezik. Buǵan deıin «Adel» (2015), «Zamýj v 30» (2016) fılmderi arqyly óziniń «Meınstrım» baǵytynda úzdik fılmder túsire alatynyn dáleldegen Asqar Bısembınniń stıli jaǵynan Tımýr Bekmambetovtyń «Iolkı» fılmine óte jaqyn shyqqan bul týyndysy da kórermenniń kóńilinen shyǵatyny kúmán týdyrmaıdy.
Mahabbat pen dostyq, úlkenge degen qurmet pen kishige degen izetti dáripteıtin fılmdegi negizgi keıipkerlerdi Berik Aıtjanov, Anatolıı Krejenchýkov, Danagúl Temirsultanova, Aldabek Shalbaev, Shárip Serik syndy otanymyzdyń beldi akterleri men Janar Duǵalova, Kental, Aıqyn Tólepbergen qatarly estrada juldyzdary joǵary deńgeıde somdap shyqqan.
Oqıǵa jelisi kóktemde órbıtin fılmniń túsirilimi 2016 jyldyń jazynda ótipti. Ystyq kúni qalyń kıim kıip, qyz-qyz qaınaǵan qazandardyń býdaqtaǵan tútinimen demalýǵa májbúr bolǵan akter qaýymy túsirilimniń ońaı bolmaǵanyn kúlkimen eske aldy.
Joba prodıýseri Svıatoslav Býlakovskıı zaldaǵy otyrǵan kórermenniń ystyq yqylysyna bólengen «Naýryz.kz» fılminiń jalǵasyn túsirýge daıyndyq jumystaryn bastap ketkenderin aıtyp, jaǵymdy jańalyǵymen bólisti.
«Naýryz.kz» fılmi 16 naýryzdan bastap elimizdegi barlyq kınoteatrlarda kórsetile bastaıdy.