Qazaqstannyń ár aımaǵynan jınalǵan dástúrli ónerdiń ókilderi men "Alataý" dástúrli óner teatry arasynda yntymaqtastyq kelisim – Memorandým ótkizildi. Memorandýmnyń negizgi maqsattary týraly "Alataý" dástúrli óner teatrynyń dırektory Berik Júsipov:
"Bul memorandýmnyń negizgi maqsaty dástúrli ónerdi nasıhattaý, zamanǵa saı damytý jáne ónerpazdardyń shyǵarmashylyǵyn qoldap, shetelderge shyǵý, festıvalder, konertter uıymdastyrý, shyǵarmashylyq keshter ótkizý josparlanyp otyr. Memorandýmǵa qol qoıylǵannan keıin osy josparlardy baǵdarlamaǵa engizemiz" – dep ashyp aıtty.
Bul ıdeıany qatysýshy ónerpazdar biraýyzdan qoldap, Almatymen baılanysta bolatyndaı, aımaqtardaǵy tanylmaǵan daryndardy ashý maqsatynda fılıaldar ashý týraly usynys ortaǵa tastaldy. Bul baǵyttaǵy jumystar da baǵdarlamaǵa engizilip, aldaǵy ýaqytta iske asyrýǵa kúsh jumsalady.
Qazirgi ýaqytta Qazaqstannyń barlyq aımaqtaryna tán dástúrli óner túrlerin bir arnaǵa toǵystyryp, zamanaýı úrdisterge saı damyta nasıhattaıtyn, ulttyq ónerdiń bolashaǵyn zerdeleýge baǵyttalǵan jalǵyz mádenıet oshaǵy "Alataý" dástúrli óner teatrynyń qurylǵanyna bir jyl tolýyna jáne qala kúnine oraı "Alataý alabynda" atty dástúrli óner keshi ótedi.
Merekelik is-sharaǵa qazaq dástúrli óneriniń has sheberleri: Sáýle Janpeıisova, Jáken Omarov, Erkin Shúkimanov, Ramazan Stamǵazıev, Aıgúl Úlkenbaeva, Uljan Baıbosynova, Batyrjan Myqtybaev, Aıgúl Qosanova, Saıan Aqmolda, Erbol Aıtbaev, Janǵalı Júzbaev, Elmıra Jańabergenova, Qaırat Kákimov, Talǵat Muqyshev, Ardaq Isataeva, Tileýles Qurmanǵalıev, Gúlmıra Sarına, Nurken Áshirov, Klara Tólenbaeva syndy sahna maıtalmandary qatysady.
