Gúlzııa Sadýaqasova
M.Áýezov atyndaǵy drama teatry, baspasóz bóliminiń jýrnalısti
Búgin teatr ujymy ákem-teatrdyń ákesindeı bolǵan Áz aǵanyń Keńsaıdaǵy
baqılyq úıiniń basyna baryp, taǵzym
etip, quran baǵyshtady.
Teatr ónerinde qustyń qos qanatyndaı bolyp, ult rýhanııatyn zaý kókke
samǵatqan Ázirbaıjan aǵa men Ǵazıza apaıdyń qatar jatqan qabiriniń basynda
shákirti ǵana emes, Áz aǵanyń inisine aınalǵan, bul kúnde Alty Alashtyń irisine
aınalǵan Asanáli Áshimov tebirenip sóz sóıledi: «Ázirbaıjan Mádıuly men Ǵazıza
Jubanova sııaqty uly tulǵalar týraly ulaǵatty sóz aıtý úshin, eske alyp, esti
áńgime aıtý úshin adam jan-dúnıesimen tazaryp kelý kerek. Men de búgin sol
qurmetke laıyq taǵzym jasaý úshin tazaryp kelip otyrmyn» - dedi Asanáli Áshimov.
Oılandyq. Tebirendik. Arqamyz shymyrlady... Sálden keıin teatr dırektory Erlan
Bilálge burylyp: «Abaıdyń monologyn oqyshy» -dep kúrsindi.
Keshe ǵana teatr maýsymasharynda Abaıdyń rólin somdaǵan E.Bilál irkilmesten,
adamzattyń aqyl-oıyna aınalǵan Abaıdyń monologyn móldiretti, móltildetti.
Tebirenip turǵan jurttyń júregin eljiretti.
Biz, baqıdyń jolyna baǵyt burǵan uly tulǵalarmen, tirshilik dińgeginiń túbin
nyqtaǵan uly tulǵalardyń arasyndaǵy áńgime osyndaı ulaǵatty da uly júrekpen jalǵasatyndyǵyn,
ózara syrlasatyndyǵyn sezindik. Iá, olar osylaı sóılesedi eken... Asanáli aǵa sony sezindirdi, E.Bilál sony
uǵyndyrdy.
Búkil ǵumyryn ult rýhanııatyna arnaǵan ulylarymyzǵa osylaı taǵzym jasap
qaıttyq.
Sodan soń, teatr sahnasyndaǵy talaı uly shyǵarmalardyń týýyna sebepker
bolǵan Áz aǵa men Ǵazıza apaıdyń quthanasyna arnaıy at basyn burdyq. Qazir ol –
quthana jáı úı emes, Ahmet Jubanov sııaqty
alyptyń, Áz aǵa men Ǵazıza apaı syndy qazynanyń búkil murasy jınalǵan mýzeıge
aınalǵan. Ulylardyń urpaqtary uıadaı jyly
kóńilmen qarsy alyp, qasıetti ordanyń qazynasymen qaýyshtyrdy. Taǵdyry
taǵylymǵa toly tulǵalardyń ómirimen tanystyrdy.
Áz aǵanyń kózin kórgen teatrymyzdyń ardaqty aǵalary men aıaýly apalary
keshegi qaıtalanbas baqytty shaǵyna oralyp qaıtty. Al, qalǵan jastar qaıtalanbas
has tulǵalardyń qajyrly eńbegine súısinip, oılanyp qaıtty.
«Ult bolyp uıysý jolynda ulylaryńdy ulyqta, ulylyqqa bastar ulaǵatyńdy eshqashan umytpa!» - degen
rýhty sóz júrek tusynda shyryldap shyrqap turdy.
