«Izdep taptym seni» spektakli «Astana Jastar» teatrynyń repertýaryndaǵy úzdik qoıylymdardyń biri. Qoıýshy rejısseri – Dáýren Serǵazın. Pesa avtory tatar jazýshysy – T.Mıńnýllın. Qazaq tiline aýdarǵan – Iran Ǵaıyp.

Bul psıhologııalyq drama, qoldaǵy bardy baǵalap, keship jatqan ómirimizge shúkirshilikpen qaraýǵa shaqyratyndaı.

Soǵysta qos aıaǵynan aıyrylǵan Rahymjannyń ómiri. Ol da sezim atty uly qubylysty bastan ótkergisi keledi. Taǵdyr tálkegine salynǵan Rahymjan, óz ómirin vırtýaldyq álemge almastyrǵan. Tek, tańnan keshke deıin telefonnan bas almaı, mahabbatyn osy álemnen izdemekshi bolady.

Rejısserlik jumystyń sheberligi óte joǵary. Sahnadaǵy eki adamnyń sezimderin, bıshiler dýeti arqyly asha tústi. Eki bıshi de san márte sezimdermen arpalysyp, aqyr sońynda sezim olarǵa baǵyt baǵdar berip, eki jannyń qosylýyna bul adam kelbetindegi sezimder úlken ról oınady.

Degenmen, kórermen túsine bermeıtin tustary da boldy. Mundaǵy qos aıaǵynan aıyrlǵan jigittiń, qaı maıdanda soǵysqany týraly kórinis tolyqtaı ashylmady. Meniń oıymsha, Aýǵan soǵysynda jer jarylǵysh zattary kóptep qoıylǵan bolatyn. Múmkin, Rahymjan sol soǵystyń ardageri. Jáne de, bul qoıylymda aıǵaı tym kóp. Ádemi dıalogtardyń arasynda aıǵaıdyń oryn alýy, kórermendi shoshytyp jiberýge deıin aparatyny sózsiz.

Qoıylym fınaly óte áserli boldy. Eki múgedek, bir-birimen kezdeskende, ekeýiniń arbadan turyp, qol ustasyp shyǵýy mahabbat atty sezimniń qanshalyqty uly kúsh ekenin kórsetedi. Qanshama arpalysyp, qıyndyqqa kóz jumyp, ómirlik adamyńdy tapsań, onymen taý-tasty qoparasyń degen maǵynada kórsetip turǵandaı.

Qoıylym orynnan turyp, qol soǵatyndaı dárejede boldy. Akterlik oıyn da joǵarǵy deńgeıde. Iá, ár týyndyda qateliksiz bolmaıdy. Ony da «Jastar teatry» túzeıdi degen nıettemiz. Kórermen tarapynan aıtar bolsam, bul qoıylymnan kóp sabaq aldym. Qandaı kemshilik bolmasyn boıymyzdaǵy sezim atty uly qubylystyń laýlaı janǵan otynyń sónýine jol bermeýimiz kerek.