«Sheshenniń tili ortaq, sheberdiń qoly ortaq», deıdi qazaqtyń maqaly. Rasynda kisiniń ózinen góri, isi árqashan ozyq. Oǵan Almatyda ótken «Sheber» atty respýblıkalyq qolónershiler baıqaýynyń festıvali dálel. Toǵyzynshy ret ótken baıqaýǵa bıylǵy jyly toqsannan astam sheberler usynys bergen eken, onyń ishinen bilikti ádilqazy músheleri otyz alty úzdik jumysty tańdady.

Olardyń arasynan on bir jeńimpaz erekshelendi. Jeńimpazdardyń arasynda jas zerger – Talshyn Kókenova baıqaý jáne óziniń jeńisi týraly bylaı deıdi:

- Meniń osy baıqaýǵa qatysqan sebebim, zergerlikte ózimniń jeke stılimdi tapqym keldi. Basynan-aq bul baıqaýǵa ońaılyqpen qatysý, erekshelený ońaı emes ekendigi belgili bolatyn. Degenimen men úshin, baıqaýǵa qatysý úlken synaq jáne kemelge jetý jolyndaǵy mańyzdy tájirıbe boldy. Bıylǵy qatysýym – ekinshi áreketim, biraq buryn jumysym fınalǵa ótpese de, bıyl taǵy qatysýǵa sheshim qabyldadym. Jeńimpaz atanǵanyma qýanyshtymyn, men úshin ol mańyzdy. Baıqaýdyń basty maqsaty – sheberlerdi qoldaý, damý jolynda úles qosý.

«Sheber 2017» baıqaýynyń jeńimpaz atanǵandar: «Daryndy bastaý» nomınaııa boıynsha Talshyn Kókenova, Tóleı Qýandyqov, Esbol Maýlitov;  «Asyl ustaz» – Gúlmıra Terlikbaeva; «Jańashyldyq» – Qaıyrbek Jeksembaev; Baýyrjan Jetpisálıev; «Tóltýmalyq» – Mereke Aıdarsha; «Joǵary sheberlik» – Jolaýshy Turdyǵulov, Erkin Baısultanov, Saǵyndyq Beısenbaev Seıfýlla Rystan.

Ústimizdegi jyly, festıvaldiń bas uıymdastyrýshysy Qolónershiler Odaǵynyń bes jyldyǵyna oraı eki úzdik jáne Qazaqstannyń qolónerine úlesin qosqan Bıbıjar Sımova jáne Muhamedjan Zeınelhanǵa «Has Sheber» ataǵy berildi, kúmis medaldary men sertıfıkattarymen marapattalyndy. Mereıtoı qarsańynda eńbek sińirgen, «Has sheber» ataǵynyń ıegeri, áıgili zerger Aman Muqajanovtyń jumystary jınaǵynyń, qolónershiler odaǵynyń tóraǵasy Aıjan Bekqulova jáne has sheber Áýes Saǵynaevanyń ortaq etnıkalyq kıim toptamasynyń, sondaı-aq, «Uly dala sheberleri» atty qazaqstannyń tanymal ismerlerdiń portrettik jınaqtamasynyń ashyq hattary shyǵaryldy.

Úsh kúndik festıval kezinde ótetin, dástúrge aınalǵan kıim toptamalardyń kórsetilýinde tanymal Ilıa Kazakov óziniń zergerlik jańa buıymdarynyń jınaǵyn, «Qazaqtar teńiz saıahatshylary bolǵan kezde...» atty Aıjan Bekqulova jáne Áýes Saǵynaevanyń ortaq etnıkalyq kıim toptamasyn, Almaty Tehnologııalyq Ýnıversıtetiniń stýdentteri men oqytýshylary tórt kıim toptamalaryn usyndy. «Sheber» festıvaliniń barysynda toptamalardan basqa kóptegen qyzyqty is-sharalar júrgizildi, mysaly Shine Show jaryqtyq kórsetilimi, sheberlerdiń master-klasstary, professor K.K. Mýrataevtiń dárisi, American Space Almaty ókili Gaýhar Mýkammamnyń foto-kýrsy, fınalısteri men jeńimpazdardyń jumystarynyń kórmesi jáne qolónershilerdiń jármeńkesi.

Sońǵy toǵyz jyl boıy «Sheber» baıqaýy Shevron kompanııasynyń qarjylaı kómegimen ótkizilýde. Osy joly da festıval Qazaqstan Respýblıkasynyń Mádenıet jáne Sport Mınıstrligi, Shevron kompanııasy, Transforma teatry, Impact HUB, FEA, Á.Qasteev atyndaǵy Óner Murajaıy, American Space Almaty, Almaty qurylys jáne halyqtyq kásipshilik kolledji, City Nomads, QQ «Our Heritage», Almaty Tehnologııalyq Ýnıversıteti, Shine Show, Eriktiler Lıgasy sııaqty seristesterdiń qoldaýymen ótti.