Әсерлі және тартымды оқиғалар, жан тебірентер сезімтал, жалынды өлеңдер - «Алтын тобылғы» әдеби байқауына қатысқан жас ақындар мен жазушылардың шығармаларының денін осылай сипаттауға болады.
Биылғы жылы пандемия өз түзетулерін енгізді, сондықтан байқау жеңімпаздарын жариялау онлайн режимінде өтті.
Нұрсұлтан Назарбаев Қорының атқарушы директоры Қанат Жұмабаев іс-шараның ашылу салтанатында: «Алтын тобылғы» - жылдан жылға танымалдылыққа ие болып келе жатқан жобалардың бірі. Егер 2015 жылы байқауға қатысуға 120 шығарма берілсе, биыл авторлардан Қазақстанның барлық өңірлерінен 161 жұмыс келіп түсті. Біз әр қатысушыға байқауға қызығушылық танытқаны үшін, ерекше шығармалары үшін алғысымызды білдіреміз», - деп атап өтті.
Қанат Жұмабаевтың айтуынша, байқауға қатысқан жас қалам шеберлерінің шығармалары өмірден алынған шынайы және ойдан шығарылған қызықты оқиғалар. Олар адамдардың ізгілігіне, адамгершілік қасиеттеріне, еліміздің ұлы тұлғаларына, Қазақстанның дәстүрлері мен жетістіктеріне арналған.
Құрамына журналистика ардагерлері мен мәдениет қайраткерлері енген қазылар алқасының мүшелері жас авторлардың туындылары қоғамда рухани құндылықтарды нығайтуға, елімізде әдеби шығармашылықты дамытуға септігін тигізетінін атап өтті.
Биыл Ұлы Абай Құнанбаевтың 175 жылдығына орай «Абайдың 175 жылдығына арналған шығармалар» арнайы сыйлығы тағайындалды.
Байқау жеңімпаздары:
- «Жылдың үздік поэзиясы» номинациясында – «Дала жырлары» шығармасы, (Жәнібек Әлиман, Қарағанды қаласы);
- «Жылдың үздік прозасы» - «Мәжусилер» хикаяты, (Бақытбек Қадыр, Түркістан қаласы);
- «Жылдың үздік балалар шығармасы» - «Күннен келген Батыр» шығармасы (Хамит Есеман, Тараз қаласы);
- «Жылдың үздік драматургиясы» - «Куәгер» драмасы (Қолғанат Мұрат, Алматы облысы).
Жоғарыда аталған жеңімпаздардың әрқайсысы 2 миллион теңгеден алды.
Қазылар алқасының мүшелері «Абайдың 175 жылдығына арналған шығармалар» арнайы сыйлығының жеңімпазын анықтау барысында, сыйлықты екі қатысушыға тағайындауды жөн деп санады. Олар:
- Ұмтыл Зарыққанұлы, Нұр-Сұлтан қаласы («Шыңғыстау. Мінәжат. Хакім» өлеңдер топтамасы);
- Бағашар Тұрсынбайұлы, Алматы қаласы («Жас Абай» эссесі).
Бұл қатысушылардың әрқайсы 1,5 миллион теңге көлеміндегі сыйақы алды.
Ашылу салтанаты:
