«Nege siz komedııa túsiretin rejısserler dramalyq fılm túsirgisi kelmeıdi dep oılaısyz?» degen suraq qoıyldy. Alǵashynda tosylyp qalǵanyńmen, jaýap daıyn. Komedııa kóbine kommerııalyq baǵytta, ıaǵnı, shyǵyndanǵan qarjyny shyǵaryp alyp, ústinen tabys kórý maqsatynda túsiriledi. Al dramadan qomaqty qarjy jınaı almaısyń. Sebebi, jumystan onsyz da sharshap keletin halyq tolǵandyratyn kartınalardy kórgisi joq. Onyń bir dáleli – «Kann» kınofestıvalinen keıin aty dúrkiregen «Aıka» fılminiń tusaýkeseri 2500 adamǵa arnalǵan Almaty qalasyndaǵy Respýblıka Saraıynda ótti. Qyzyl kilemge jınalǵan qalyń kópshilik, júrgizýshiniń «Barlyqtaryńyzdy fılm kórýge shaqyramyz» degen sózinen keıin tarqasa bastady. Tek naǵyz kıno súıer qaýym saraıǵa kirdi. Nelikten? Jarnama jetispedi desek qatty qatelesemiz. Sebebi, halyq kóredi, oqıdy degen buqarattyq aqparat quraldarynda «Aıka» fılmi jáne Samal Eslıamova esimi san márte jazylyp, kórsetilip jatty. Demek, halyqta dramaǵa, ásirese avtorlyq kınoǵa degen asa qyzyǵýshylyq joq. Osydan keıin tabys kórgisi keletin prodıýserler qaıdan drama túsirsin. Taqyrypqa oralaıyq.
Sonymen, komedııa «korolderi» drama janrynda shynymen-aq fılm túsirgisi kelmeıdi me eken? «Iá» desek, jalǵan sóılegen bolamyz. «Sabına kelin» fılmimen rejısser retinde tanylǵan Nurtas Adambaı óziniń «2=1» (eki komedııa = bir drama) tásilin ustanyp, drama janrynda túsirgen «Lıft» fılmin halyqqa usyndy. Sonda rejısserdiń fılmografııasy mynandaı nátıje beredi eken: «Sabına kelin» (2014j.), «Aýyldan qashý: «Mahabbat» operaııasy» (2015j.) komedııalary = «Taraz» dramasy (2016j.); «Sabına kelin 2» (2016j.), «Men kúıeý jigitpin» komedııalary (2018j.) = «Lıft» dramasy (2018j.) Bul degenimiz komedııa túsiretin rejısserlardyń drama túsirýge qaýqary bar degen sóz. Túsire alady degende jańa sapada, jaqsy akterlyq oıynmen, ózindik jańashyldyqpen túsirgen jumysty meńzep otyrmyn.
«Lıft». Eki adamnyń jedelsatyda qamalyp qalatynyn fılmniń ataýynan-aq uǵyp qoıǵan shyǵarsyz? Solaı isteseńiz – dál taptyńyz. Tek olar bir nemese birneshe saǵatqa emes, uzaq ýaqytqa qamalady. Zaryqqan adamdar ýaqyt ótkizý úshin bir-biriniń áńgimesin tyńdap, ýaqyt óltirýge tyrysady. Biraq olar ýaqytpen birge senim, shynaıylyq, qurmet sekildi aıryqsha mańyzǵa ıe qajettilikterdi óltirip alady. Eki «jolaýshynyń» jedelsatymen joǵarydan tómenge túsýin teńeý retinde alýǵa bolatyndaı. Eki adamnyń emes, adamzattyń tómen túsýi sekildi. Lıftide eki adamnyń áńgimesimen bir jarym saǵat ýaqytymdy ótkizemin dep oılaǵan kórermen jańylysady. Keıipkerlerge ótkenin eske túsirtý arqyly rejısser túrli lokaııalarǵa, ótken ǵasyrǵa sholý jasaıdy.
Fılmniń jalǵyz-aq posteri bar. Posterde jas jigit pen eresek kisi bir-birine qatygez kózqaraspen qarap turady. Biri – baı balasy Tımýr (Jandos Aıbasov), ekinshisi – kúzetshi Asqar (Iisbek Ábilmájinov). Iisbek Ábilmájinov – fılmdegi basty fıgýranyń beınesin somdaıdy. Somdaǵanda qandaı! Qoǵamdyq kólikke nemese taksıge otyrǵanda jaıdary, kóńili ashyq, orysshaǵa shorqaq, aýyldy eske túsiretin adamdar barlyǵyńyzǵa kezdesken shyǵar. Sol beıneni Iisbek aǵanyń oryndaýynda ekrannan kóre alamyz. Sońynda ózine sabaq alatyn Tımýrdyń rólin somdaýshy Jandos Aıbasovtyń da sheberligi osal emes. Epızodtyq keıipkerlerdi somdaǵan Á.Imanbaev, A.Sharǵyn sekildi talantty akterler oınaıtyn er adamdyq akterlyq quram jaqsy tańdalynǵan.
Fılmniń negizgi lokaııasy retinde lıft alyndy. Uzyndyǵy 3-4 metrdeı bolatyn «túsirilim alańynda» jumys jasaý ońaı bolmaǵany belgili. Iri planmen ǵana shektelmeı, eki adamnyń is-áreketin ár túrli rakýrstan kórsetý arqyly tamasha nátıjege jetken operator Azamat Dýlatov – ár jumysy saıyn sheberligin shyńdap keledi. Osy rette operatorlyq quramdy quttyqtap qoıýǵa ábden bolady.
Grım, dekoraııa kóńil tolarlyq. Al kostıýmdegi baılanyspaı qalǵan kemshil tustardy kóp kórermen baıqamaı da qalady. Álbette, keleside bundaı qatelikke jol berilmeýin qalaımyz.
«Lıft» fılmi – tájirıbe arqyly, eńbektenip, izdený arqyly kórermenge qymsynbaı usyna alatyn ónim jasaýǵa bolatynyn kórsetken týyndy. N.Adambaı bul týyndymen bir «qabatqa» joǵarylady. Jeltoqsan aıynda shyǵatyn rejısserdiń «Qudalar» komedııasy qalyptasyp kele jatqan oń kózqarasty buzbaıdy degen senimdemiz.
