suhbattasqan: Aıdana Baýyrjanqyzy
kınotanýshy
Shuǵyla, jeńisińiz qutty bolsyn! Festıval jaıynda qandaı estelikterińizben bólise alasyz?
Festıval alǵashqy ret ótkizilip jatqanymen, uıymdastyrýy joǵary deńgeıde boldy. Biz bir aı buryn aldyn-ala joldama aldyq. Kúndelikti ár túrli memleketten kelgen fılmderdi tamashalaýmen qatar, qala boıynsha ekskýrsııalar uıymdastyryldy, sol sebepti, festıvaldegi ár kúnimiz tolyq, ári qyzyqty ótti. Maǵan unady...
Festıvaldiń konkýrstyq fılmderi jaıynda qandaı pikir aıta alasyz?
Men úshin konkýrstyq baǵdarlamanyń fılmderin kórgen óte qyzyqty boldy. Jalpy, Qazaqstannan qatysqan «Shyńyraý», «Kisi» fılmderin atap óter edim. Óıtkeni, ishinde qazaq eliniń dástúri kórsetildi jáne bastysy qazaq tilinde boldy. Ár elden kelgen fılmder bir-birine uqsamaıdy, ózgeshe. Taǵy bir baıqaǵanym, Reseıden kelgen fılmderdiń basym bóligi komedııa janryndaǵy telehıkaıalar sekildi áser qaldyrdy. Iran memleketinen qatysqan derekti týyndy maǵan óte qatty unady. Fılmde sóz jáne mýzyka qoldanylmady jáne aıanyshty jerlerinde ásireleý de bolmady. Máselen, múgedek adamdardy kórsetkende, arnaıy soǵan ekpin berip, kórermenniń aıaýshylyǵyn jasandy týǵyzýǵa tyryspady. Biraq, soǵan qaramastan óte aıanyshty boldy. Fılm sezimge toly, sondyqtan ár kórermenniń júregine jetti dep oılaımyn.
Siz úshin jaqsy fılm qandaı bolýy kerek?
Fılmde eń mańyzdysy – sezim. Fılmdi kórgende kishkentaı nárseni bolsyn seziný tamasha áser qaldyrady. Sol sebepti, meniń oıymsha, jaqsy fılm jasaý úshin aldyńǵy kezekte, aınalany sezine bilý kerek. Sodan keıin, jaqsy fılmder kórip, kitaptardan nár alǵan abzal. Óıtkeni, sezingenińdi kıno tilimen jetkize bilýdiń ózi de eskeriletin jáıt.
«Samal» fılmi arqyly kórermenge qandaı ıdeıa jetkizgińiz keldi?
Belgili bir ıdeıany jetkizý men úshin birinshi kezekte bolǵan joq. Jáne de arnaıy kıno stılin ustap turý da shart emes sekildi. Bastysy kıno tilimen bir áńgimeni aıtyp berip, kórermege áser qaldyrý. Samal fılmi arqyly, kórermenge kishkene bolsyn sezim qaldyrǵym keldi.
Kelesi týyndyńyz ne jaıynda bolmaq?
Kelesi fılmimde ózimniń anam týraly aıtqym keledi. Shyn máninde, kóp otbasynyń basty baqyty – ana. Analardyń úlken mańyzdy maqsattary joq bolýy múmkin, olar batyr da emes sekildi. Degenmen, olar otbasylary úshin, balalary úshin ómir súredi. Bir sózben aıtqanda, kezekti týyndy da, qyz ben ananyń arasyndaǵy baılanysy taqyrybynda bolmaq...
Suhbatyńyzǵa rahmet!
