Memlekettik Qýyrshaq teatry – respýblıka tarıhyndaǵy tuńǵysh qýyrshaq teatry. Qazaq jerinde ótken ǵasyrdyń basynda paıda bolǵan qara shańyraq birneshe býyn jastardy tárbıelep, baldyrǵandardyń jan-jaqty azamat bolyp qalyptasýyna óz úlesin qosyp keledi. Bıylǵy maýsymnyń ózinde «Saǵynysh shóbi» (avt.: R.Otarbaev, rej.: R.Janyamanov), «Arman álemi» (rej.: N.Kósherbaev), «Batyldar ýaqyty» (rej.: A.Zaıev), «Medeıa» (avt.: Evrıpıd, rej.: A.Salban), «Romeo-Djýletta» (avt.: Ý.Shekspır, rej.: D.Jumabaeva) syndy san túrli oqıǵalardy sahnalaıtyn qoıylymdar kórermen nazaryna usynylyp, kópshiliktiń zor qoshemetine bólendi. Elimizde jáne shet elderde ótken respýblıkalyq, halyqaralyq teatr festıvalderinde top jaryp júrgen óner oshaǵynyń repertýarlyq saıasatynyń aýqymy keń.
Osy oraıda, teatr ujymy 21 naýryz - Halyqaralyq Qýyrshaqtar teatry kúnine oraı ekinshi ret aǵymdaǵy jyldyń 18-21 naýryz kúnderi aralyǵynda «QÝYRShAQTAR ShAQYRADY – 2019» atty II teatrishilik festıvalin ótkizedi. Festıvaldiń basty maqsaty – teatr repertýaryndaǵy 2018-2019 jyldar aralyǵynda saxnaǵa jol tartqan qoıylymdardy saralaı otyryp, qýyrshaq óneriniń qoǵamǵa áser-yqpalyn arttyryp, dástúrli ulttyq qýyrshaqtarymyzdy jańǵyrta túsý arqyly jas urpaqty izgilik ıdeıalaryna tárbıeleý. Qýyrshaq teatry óneriniń damýy jolynda kórkemdik-estetıkalyq izdenis kókjıegin keńeıtý.
Festıval aıasynda kásibı sarapshylar men kórermender nazaryna teatr repertýarynan 5 qoıylym usynylyp, spektakl sońynda taldaý jasalynady. Atalmysh sharaǵa qazylyq etýge Reseı jáne Túrkııa elderi men Astana qalasynan arnaıy sarapshylar shaqyryldy. Olardyń qataryn: Eshmuratova Quralaı Haleketqyzy – rejısser, Qazaqstannyń eńbek sińirgen artısi, Astana qalalyq qýyrshaq teatrynyń kórkemdik jetekshisi (Qazaqstan Respýblıkasy, Astana), Smırnov Kırıll Edýardovıch – «Pokolenıe» teatrynyń qýyrshaq júrgizý mamany, (Reseı Federaııasy, Sankt-Peterbýrg), Marına Iýdje – rejısser, «Tempo» qýyrshaq teatrynyń dırektory jáne teatrdyń kórermenmen baılanys jónindegi jetekshisi (Túrkııa, Ankara) quraıdy.
«QÝYRShAQTAR ShAQYRADY – 2019» atty II teatrishilik festıvaliniń alǵashqy kúni elimizdiń telearnalary men radıolarynan, túrli basylymdardan tilshiler kelip, baspasóz konferenııasymen bastalady.
Sondaı-aq, festıvaldiń ashylý saltanaty aıasynda – «Asia Doll» Qazaqstan qýyrshaq jasaý sheberleriniń shyǵarmashylyq odaǵy dızaınerlik qýyrshaqtar men Teddy aıýlarynan kórme uıymdastyrmaq. Bıylǵy jyly atalmysh kórmege Almaty, Óskemen, Kókshetaý, Taraz, Temirtaý, Astana, Semeı, Altaı, Bishkek, Nıjnıı Novgorod, Sankt-Peterbýrg, Kalınıngrad, Barnaýl qalalarynan eń tańdaýly degen 25 sheberdiń túrli tehnıkalarda: polımerli balshyq, toqyma, kıiz qýyrshaqtarynan jasalǵan jumystary kórermen nazaryna usynylady. Óner týyndylarynyń qataryn Teddy aıýlary, dızaınerlik áshekeıler, oıynshyqtar jáne káde syılar tolyqtyrmaq.
Teatrishilik festıvaldiń úshinshi kúni sarapshylar qatysýymen sheberlik saǵattary ótedi.
«QÝYRShAQTAR ShAQYRADY – 2019» II teatrishilik festıvaline qatysqan qoıylymdar men teatr artısteri: «Úzdik qoıylym», «Úzdik akter», «Úzdik aktrısa», «Úzdik qýyrshaq júrgizýshisi», «Úzdik qýyrshaq daýysy», «Úmit», «Úzdik epızod», «Úzdik qýyrshaq jasaý sheberi» syndy atalymdar boıynsha marapattalmaq.
Aıjan ESENGELDI
BAQ jónindegi menedjer
