M.O.Áýezov atyndaǵy Ádebıet jáne óner ınstıtýtynyń ujymy kórnekti ǵalym, QR Ulttyq ǵylym akademııasynyń korrespondent múshesi, ónertaný doktory, Sh.Ýálıhanov atyndaǵy syılyqtyń laýreaty, Qazaqstan kompozıtorlar Odaǵynyń múshesi, Qazaqstannyń Eńbek sińirgen qaıratkeri, «Qurmet» ordeni men «Eńbek ardageri» medaliniń ıegeri Sara Ádilgereıqyzy Kúzembaıdyń 2020 jyldyń 16-naýryzynda 83 jasqa qaraǵan shaǵynda ómirden ótkenin habarlaıdy.
Sara Ádilkereıqyzy dástúrli jáne qazirgi zaman mýzykasynyń ártúrli aspektilerin, ulttyq óner jolynyń tarıhı-teorııalyq qalyptasýyn, kompozıtorlyq shyǵarmashylyqtyń kórkemdik-stıldik baǵyttaryn, Shyǵys jáne Batys Eýropa mádenıetindegi folklorlyq jańashyldyq belgilerdiń toǵysýy sııaqty kúrdeli problemalardy, sonymen qatar, mýzykalyq teatrdyń qalyptasýy jáne damýyn, oryndaýshylyq ónerdiń asqan sheberleriniń shyǵarmashylyǵyn tereń zerttedi. Jarty ǵasyrlyq ǵylym jolynda 500-den astam ǵylymı jáne mýzykalyq synı eńbekter jazdy, 15-ke jýyq monografııa, ǵylymı kitaptar men zertteýler jarııalady.
Sara Ádilgereıqyzy Kúzembaıdyń esimi respýblıka kóleminde ǵana emes, elimizden tys jaqyn jáne alys shetelderge tanymal. 2004 jyly «Álemniń kórnekti áıelderi» ataǵyna ıe bolyp, ǵalymnyń esimi AQSh-tyń Soltústik Karolına shtatynda ornalasqan dúnıejúzilik ómirbaıandyq ınstıtýtynyń kitabyna engen bolatyn.
Oner.kz portaly Sara Ábdilkereıqyzynyń týǵan-týystaryna, barsha qazaq jurtyna kóńil bildiredi.
