Keshe, 10 qyrkúıekte, Sala Darsena kınoteatrynda, 77-Veneııa halyqaralyq kınofestıvalinde rejısser Ádilhan Erjanovtyń "Sary mysyq" kórkem fılminiń álemdik tusaýkeseri bolyp ótti. Kartına "Kókjıekter" konkýrstyq baǵdarlamasyna qatysýda. Bıylǵy jyly álemdegi eń iri jáne bedeldi festıvalderdiń biri 2-12 qyrkúıek aralyǵynda pandemııaǵa qaramastan tolyqqandy oflaın formatta ótýde.
"Kókjıekter" halyqaralyq qazylar alqasyn osy jyly aty ańyzǵa aınalǵan franýz rejısseri Kler Denı ("Jaqsy jumys", "Kúndi kirgiz", "Joǵarǵy qoǵam") basqaryp otyr. Kartınany Short Brothers (Qazaqstan), "Qazaqfılm" kınostýdııasy (Qazaqstan) jáne Arizona Productions (Franııa) kompanııalarynyń qatysýymen ZERDE FILMS (Qazaqstan) kompanııasy túsirgen. Bas prodıýserler Ásel Sádýaqasova, Qanat Bektemirov jáne Erbol Toıbaev.
Festıvalde kartınany rejısser Ádilhan Erjanov, bas prodıýserler Ásel Sádýaqasova men Qanat Bıtemirov, basty rólderdi somdaýshylar Azamat Nyǵmanov, Kamıla Nuǵmanova jáne Sanjar Mádı, sondaı-aq prodıýserler Serik Ábishev, Olga Hlaeva jáne Gııom de Sıel tanystyrýda.
Fılm komandasy óz áserlerin jasyra almaı, oqyrmandarmen bólisti:
- Meniń oıymsha, búgingi tańdaǵy Veneııanyń tiri formaty – bul kez-kelgen fılm úshin eń kúshti premera jáne men mundaı múmkindiktiń biz úshin týyndaǵanyna óte qýanyshtymyn. Osyndaı jaqsy jańalyqpen "Sary mysyq" fılminiń búkil komandasyn quttyqtaımyn! – dedi rejısser Ádilhan Erjanov.
- Veneııada kórsetilim uıymdastyrý – bul bizdiń búkil komanda úshin úlken baqyt jáne orasan zor maqtanysh! – dedi fılmniń bas prodıýseri Ásel Sádýaqasova.
- Koronavırýsqa qaramastan, biz osyndamyz jáne bul biz úshin úlken qýanysh. Eń bastysy, qazir bizdiń fılm týraly bári estip, múmkindiginshe kóp adamdar bilýi kerek. Bul fılm tolyqtaı ómir súrýi kerek! – dedi akter Azamat Nyǵmanov.
- Men eń jaǵymdy sezimge bólenip otyrmyn. Qazir búkil álem qıyn ýaqytty bastan keshirýde, biraq bul qıyndyqtardyń bárin kıno óneri jeńip shyǵady dep senemin! – dedi akter Sanjar Mádı.
"Sary mysyq" – rejısser Erjanovtyń kórkem tolyqmetrli 9-kartınasy. Fılmniń túsirilimi ótken jyly Almaty oblysynda ótti. Fılm qazaqstandyq "Bonnı men Klaıd" oqıǵasyn baıandaıdy. Jas jigit Kermek túrmeden keıin týǵan qalasyna oralyp, bul jerde bári ózgergenin baıqaıdy – qalada aıaýsyz erejeler ornatqan qylmystyq top bılik etýde. Onyń súıiktisi Eva osy toptyń qysymyna túsip, túzý joldan taıǵan, al ol ózi bolsa qylmysqa belshesinen batqan... Degenmen, onyń bir armany bar – súıiktisimen birge bul jerden qashyp, kınoteatr salý. Jáne ol osy maqsatqa qol jetkizý úshin áreket etedi…
