Bastapqyda kınofestıvaldi 18-22 naýryz aralyǵynda Iakýtsk qalasynda tolyqqandy formatta ótkizý josparlanǵan bolatyn, alaıda koronavırýs indetine baılanysty ony "jabyq rejımde" ótkizip, tek qazylar alqasy úshin qatysýshy fılmderdiń kórsetilimi uıymdastyrylyp, jeńimpazdardy jarııalaý týraly sheshim qabyldandy. Halyqaralyq qazylar alqasyn reseılik kınorejısser Borıs Hlebnıkov ("Koktebel", "Arıtmııa") basqardy, sondaı-aq onyń quramyna rejısserler Edýard Novıkov pen Ella Manjeeva endi.
"Jeńimpaz fılm "Atbaıdyń shaıqasy" - bul árkelki keıipkerdiń tańqalarlyq oqıǵasy, basynda ol jaǵymsyz bop kóringenimen, sońyna qaraı onyń qaıǵyly ómirin túsine, sezine bastaısyń. Qarapaıym oqıǵa óte keremet tilmen aıtylǵan. Bul oqıǵanyń aıtylý máneriniń ózinde bir sıqyr jatyr. Árıne bul basty júlde", - dedi qazylar alqasynyń tóraǵasy Borıs Hlebnıkov.
"Festıval komandasy men baǵdarlamalyq dırektor Alekseı Medvedevke alǵysym sheksiz! Mundaı qıyn ýaqytta kıno men óner úshin kúresetin naǵyz janashyrlar bar ekenin moıyndaýymyz kerek. Sonymen birge, qazylar alqasynyń barlyq músheleri men meniń súıikti reseılik rejısserlerimniń biri Borıs Hlebnıkovqa "Atbaıdyń" jeńýine múmkindik bergeni úshin rahmet. Sondaı-aq, fılmniń búkil komandasyn osy jeńispen quttyqtaımyn jáne barshańyzǵa densaýlyq tileımin!" - dedi Ádilhan Erjanov.
"Short Brothers" jáne "Arizona Productions" kompanııalarynyń qatysýymen "Sunny Production"kompanııasy jasaǵan kartınanyń álemdik tusaýkeseri ótken jyly 35-Varshava Halyqaralyq kınofestıvaliniń negizgi konkýrstyq baǵdarlamasynda ótken bolatyn. Fılmniń bas prodıýseri Asel Sadvakasova kartınada basty rólderdiń birin oryndap shyqty.
Esterińizge sala keteıik, "Atbaıdyń shaıqasy" jeńimpazy aldyn ala belgili bolatyn aralas jekpe-jek boıynsha týrnırge qatysýdy sheshetin kóshe buzaqysy Atbaıdyń (akter Danııar Alshınov) ómiri jaıly baıandaıdy. Biraq, ol bul týrnırdy jeńýge bel býady, sebebi ol úshin bul jeńis - jańa ómirdi bastaý, úlken sportqa qaıta oralý jáne óziniń súıiktisi Aıdany (Dınara Baqtybaeva) qaıtarý múmkindigi. Atbaıdyń rıng boıynsha basty qarsylasy, ataqty Rafaeldiń rólin Sanjar Mádı somdady.
VI Iakýtsk Halyqaralyq kınofestıvaliniń jeńimpazdar tizimi!
