Madrıd pen Máskeýdi tań qaldyrǵan fotokórme Astanaǵa keldi

Qazaqstan elordasy - Astananyń 20 jyldyǵyna arnalǵan fotokórmeni QR Tuńǵysh Prezıdenti - Elbasynyń Qory Qazaqstan Halqy assamleıasynyń XXVI sessııasyn ótkizý sheńberinde Beıbitshilik jáne Kelisim saraıynda uıymdastyrdy. Astanalyqtar jáne elorda qonaqtary fotokórmeni ú.j. 1 mamyryna deıin «Pıramıdada» tamashalaı alady.
Madrıd pen Máskeýdi tań qaldyrǵan fotokórme Astanaǵa keldi

Birinshi ret «Astana - Uly dala injý-marjany» fotokórmesi álemdik qaýymdastyqqa ústimizdegi jylǵy sáýirde Reseı astanasy Máskeýde jáne Ispanııanyń Madrıd qalasynda usynyldy. Taıaý arada fotokórme Sankt-Peterbýrg, Pekın, London, Berlın jáne Parıj qalalarynda jalǵasady.

40-qa jýyq kartınasy bar Astananyń biregeı qurylystarynyń fotokórmesin Qazaqstannyń túrli óńirlerinen kelgen Qazaqstan Halqy Assambleıasynyń kezekti sessııasynyń delegattary jáne shaqyrylǵan qonaqtar kóre aldy. Olardyń arasynda belgili qoǵamdyq jáne saıası qaıratkerler, sondaı-aq mádenıet jáne óner qaıratkerleri, etnomádenı ortalyqtardyń ókilderi jáne dıplomattar boldy.

Fotokórmeniń tusaýkeserin Qazaqstan Respýblıkasy Tuńǵysh Prezıdenti - Elbasy Qorynyń Laýreaty, Qordyń janyndaǵy Shyǵarmashyl jastar keńesi tóraǵasynyń orynbasary, «Astana Opera» teatrynyń konertmeısteri Gaýhar Tasbergenova ótkizdi.

«Astana - Qazaqstannyń injý-marjany» qazaq memlekettiginiń jeńisine jáne el jetistiginiń jarqyn úlgisine, táýelsiz memlekettiń sımvolyna aınaldy. Bıylǵy jyly Memleket basshysy N.Nazarbaevtyń elordany Astanaǵa kóshirý týraly tarıhı sheshim qabyldaýyna 20 jyl tolady. El Prezıdentiniń Astanany damytýǵa degen nazary men turaqty qamqorshylyǵy qalanyń qarqyndy damyp kele jatqan, Eýrazııanyń ýltrazamanýı jáne básekege qabiletti megapolısine aınalýyna yqpal etti. Jańa turǵyn úı alaby men úıler, sondaı-aq ákimshilik ǵımarattar syrtqy kelbetimen bir-birine uqsamaıdy, qaıtalanbas ózindik biregeı beınesi bar. Osynyń barlyǵyn biz fotokartınalar arqyly kórsetpekshimiz», - dep tusaýkeser barysynda Gaýhar Tasbergenova atap ótti.

Kartınalar arasynda álemdik deńgeıdegi mádenıet obektilerin, atap aıtqanda Astananyń basty brendi, ǵalamnyń epıkalyq 90 ǵımaratynyń qataryna kirgen  - «Báıterek», álemniń eń ásem prezıdent saraılarynyń  TOP-10-ǵa engen Qazaqstan Respýblıkasy Prezıdentiniń rezıdenııasy «Aq Orda», Astananyń EKSPO-ortalyǵyndaǵy dıametri 80 metr sfera nysanyndaǵy erekshe qurylystardyń biri «Nur-Álem» ǵımaratyn kórýge bolady. Sondaı-aq belgili brıtan sáýletshisi Norman Fosterdiń jobasymen salynǵan biregeı qurylystardy, atap aıtqanda: «Pıramıda» -  Beıbitshilik jáne kelisim saraıy, shatyr nysanyndaǵy álemniń eń iri ǵımaraty retinde  Gınnes rekordtar kitabyna engizilgen «Hanshatyr» saýda-oıyn-saýyq kesheni, sondaı-aq «Nazarbaev ortalyǵyn» tamashalaýǵa bolady.

Kórmeniń qonaqtarynyń aıtýynsha, Astana - búkil Qazaqstan maqtanyshy jáne osyndaı fotokórmelerdiń arqasynda búkil álemge bas qalamyzdy tanystyra alamyz.

Sonymen birge, kórme qonaqtaryna Tuńǵysh Prezıdent Qorynyń tapsyrmasy boıynsha elordanyń 20 jyldyǵyna arnaıy ázirlengen «A day in Astana» fotoalbomy usynyldy. Fotokórmegedegi sýretterdi Qazaqstannyń úzdik fotograftary QR Tuńǵysh Prezıdenti - Elbasy Qorynyń tapsyrmasy boıynsha ázirlegen.

QR Tuńǵysh Prezıdenti - Elbasy Qorynyń Baspasóz qyzmeti, tel. 8 7172 708 367, 708 356