Жоба барысында ұйымдастырушылар «Актер шеберлігі», «Сахна қозғалысы», «Дәстүрлі аспаптарды меңгеру», «Кескіндеме және мүсін», «Қолтаңбалы өнер», «Грим және сән үлгісі» сынды түрлі бағыттағы шеберлік дәрістері арқылы балалардың рухани-мәдени танымын кеңейтіп қана қоймай, болашақта өнер саласына баруды көздеген бүлдіршіндерге бір күн бойы кәсіби мамандармен бірге жұмыс істеу мүмкіндігін сыйлап, армандардың орындалатынын, тек сол жолда еңбектену керектігін түсіндіруге тырысып бақты.
Бұдан бөлек, жобаның бағдарламасына «Армандар орындалады» театрландырылған қойылымы, «Асан қайғының толғауы», «Сайқымазақтардың көрмесі», «Робот» биі мен өлеңдер негізінде жасалған хореографиялық қойылымдар, фольклорлық ансамбльдің ән шашуы, сонымен қатар балалар үйінің тәрбиеленушілеріне арнайы тігілген киім үлгілерін көрсететін дефиле де болып өтті.
Жоба негізінде ұйымдастырушылар мен қызығушылық танытқан демеушілер балаларды күнделікті ас мәзірінде жоқ түрлі тағамдармен, тәттілермен қуантып, жуынатын бөлмеге арналған төсеніштер мен «Арман» кинотеатрында өткен мультфильмге билеттер тарту етіп, балаларға қуаныш пен көтеріңкі көңіл күй сыйлап қайтты. Қайырымдылық шараларын өткізу алдағы уаытта да өз жалғасын тауып, дәстүрге айналады деген сенімдеміз.
