Álemde bolyp jatqan lańkestik uıymdar men toptardyń shabýyldary bizdiń eldi de aınalyp ótpedi. Ótken jyly Aqtóbe qalasyndaǵy terrorıstik oqıǵa eldi dúrkiretip, halyq arasynda úreı týǵyzǵan bolatyn. Tosynnan tap bergen jantúrshigerlik oqıǵanyń qaıtalanbaýyna kim kepil?! Osy oqıǵanyń aqıqatyn kórsetý úshin rejısser Ásııa Baıǵojına «Senim jolynda» atty derekti fılm túsirgen bolatyn. Ásııa 2016 jyly «Jeltoqsan hronıkalary» atty fılmimen de kórermendi eleń etkizgen.
«Senim jolynda» - Aqtóbedegi lańkesterdiń temir tordaǵy qazirgi ómirin, jazyqsyz qaza bolǵan qurbandardyń jaqyndarynyń zaryn, Sırııaǵa attanǵan qazaq otbasylarynyń keshegi ómiri men búgingi ómirin kórsetedi. Eń aıanyshtysy, adasqandardyń arbaýyna ergenderdiń arasynda sanasy áli tolyq qalyptaspaǵan balalar da bar. Solardyń qandy ortada kóz jumyp jatqany jandy aýyrtady. Fılmde keı balalardyń shetelge shyǵýyna ruqsat beretin qujattyń nebári bir kún ishinde daıyndalǵany da aıtylady.
Birneshe kúnge sozylǵan oqıǵa saldarynan qazaq qoǵamy dúr silkinip, qapyda beıbit turǵyndar men Otan aldynda boryshyn múltiksiz oryndaǵan azamattar qaza tapty. Terrorızmniń qıturqy áreketinen eshqandaı ult, eshqandaı memleket tolyqqandy saqtanǵan dep aıta almaımyz. Dese de, eldiń tynyshtyǵyn buzǵan teris aǵymdarǵa tosqaýyl bola bilýimiz kerek. Birinshi kezekte dinı basqarma belsene atsalysýy kerek bolsa, ekinshiden, halyqty durys jolǵa salatyn aqparattardy keńinen nasıhattaǵan jón. Bul fılm de sol maqsatta túsirilgen dúnıeler qatarynda.
